બનારસનું નામ પડતા જ ત્યાના ચટપટા અને સ્વાદિષ્ટ ભોજનની યાદ આવી જાય છે, અને તેમાં પણ બનારસી કચોરીનું નામ સાંભળતા જ મોંમાં પાણી આવી જાય છે. બહારથી ક્રિસ્પી અને અંદરથી મસાલેદાર પૂરણવાળી આ ગરમાગરમ કચોરી સવારના નાસ્તા કે સાંજે ચા સાથે ખાવાની મજા જ કંઈક અલગ છે. જો તમને પણ બનારસની કચોરીનો સ્વાદ ગમતો હોય, તો તેને ઘરે બનાવવી ખૂબ જ સરળ છે. બસ, લોટ બાંધતી વખતે અને કચોરી તળતી વખતે કેટલીક ખાસ બાબતોનું ધ્યાન રાખવું જરૂરી છે.
જરૂરી સામગ્રી
બનારસી ખસ્તા કચોરી બનાવવા માટે મેંદો, મગ કે અડદની દાળ, તેલ અથવા ઘી, મીઠુ, હિંગ, જીરું, વરિયાળી, ધાણાજીરું, લાલ મરચું, આમચૂર (કેરીનો પાવડર) અને થોડો ગરમ મસાલો જોઈશે. લોટ બાંધવા માટે તેલ/ઘી (મોણ માટે) અને પાણી, તેમજ તળવા માટે પૂરતા પ્રમાણમાં તેલ. વધુ ચટપટા સ્વાદ માટે મસાલામાં કસૂરી મેથી પણ ઉમેરી શકાય છે.
બનાવવાની રીત
સૌપ્રથમ અડદ અથવા મગની દાળને થોડા કલાક પાણીમાં પલાળી રાખો. ત્યારબાદ પાણી નિતારીને દાળને આછી અધકચરી પીસી લો. હવે કઢાઈમાં થોડું તેલ ગરમ કરી જીરું, વરિયાળી અને હિંગ ઉમેરો. ત્યારબાદ પીસેલી દાળ ઉમેરીને સારી રીતે સાંતળો. તેમાં મીઠુ, લાલ મરચું, ધાણાજીરું, આમચૂર અને ગરમ મસાલો ઉમેરીને મિક્સ કરો. પૂરણનું પાણી સંપૂર્ણ બળી જાય ત્યાં સુધી તેને પકાવો અને પછી ઠંડુ થવા દો. એક મોટા વાસણમાં મેંદો લઈ તેમાં થોડું મીઠુ અને મોણ માટે તેલ કે ઘી ઉમેરીને બંને હાથેથી સારી રીતે મિક્સ કરો. લોટમાં મોણ એટલું હોવું જોઈએ કે હાથમાં દબાવવાથી લાડુ જેવો આકાર બને. હવે થોડું-થોડું પાણી ઉમેરીને નરમ લોટ બાંધી લો (લોટ બહુ સખત કે બહુ નરમ ન હોવો જોઈએ). લોટને 15 થી 20 મિનિટ ઢાંકીને મૂકી રાખો.
લોટ સેટ થઈ જાય એટલે તેની નાના-નાના લુઆ બનાવી લો. એક લુઈને હાથથી થોડી ફેલાવીને વચ્ચે તૈયાર કરેલું દાળનું પૂરણ ભરો. હવે કિનારીઓ ઉપર તરફ ખેંચીને મસાલાને સારી રીતે પેક કરી લો. તેને હળવા હાથે દબાવીને કચોરીનો આકાર આપો. કચોરી બહુ પાતળી ન રાખવી, થોડી જાડી કચોરી બહારથી ખસ્તા અને અંદરથી સરસ બને છે. કઢાઈમાં પૂરતું તેલ ગરમ કરો. ધ્યાન રાખો કે તેલ બહુ વધારે ગરમ ન હોવું જોઈએ, નહીં તો કચોરી ઉપરથી ઝડપથી લાલ થઈ જશે પણ અંદરથી કાચી રહેશે. કચોરીઓને તેલમાં મૂકીને ધીમી આંચ પર તળો. વચ્ચે-વચ્ચે તેને ફેરવતા રહો જેથી બંને બાજુથી સરસ સોનેરી અને ક્રિસ્પી બને. સોનેરી અને ખસ્તા થયા પછી તેને ગરમાગરમ બટાટાના શાક, લીલી ચટણી અને અચાર સાથે સર્વ કરો.
