- અગાઉ પોલીસ કમિશનર ઓફિસ ખાતે દંડ ભરી શકાતો હતો,
- ટ્રાફિકનો ભંગ કરેલા વાહનચાલકોએ 160 કરોડના મેમો ભર્યા નથી,
- ઘીકાંટા કોર્ટમાં સેન્ટર શરૂ કરાતા પ્રથમ દિવસે 68 હજારથી વધુનો દંડ લોકોએ ભર્યો
અમદાવાદઃ શહેરમાં ટ્રાફિકના નિયમોનો ભંગ કરનારા વાહનચાલકોને ઈ-મેમો આપવામાં આવે છે. સીસીટીવી કેમેરા દ્વારા પણ ટ્રાફિકભંગના ફોટા પાડીને વાહનમાલિકોને તેમના મોબાઈલ ફોન પર ઈ-મેમો આપવામાં આવતો હોય છે. પરંતુ ઘણાબધા વાહનમાલિકો આ-મેમો ભરતા નથી. મહિનાઓ સુધી ઈ-મેમો ન ભરનારા વાહન માલિકોને ઘીકાંટા કોર્ટમાંથી સમન્સ પણ ઈસ્યુ કરવામાં આવતા હોય છે. હવે વાહન માલિકો દંડ ભરી શકે તે માટે ઘી કાંટા ખાતે આવેલા ચીફ જ્યુડિશિયલ મેજિસ્ટ્રેટ કોર્ટના પાંચમાં માળે ઇ-ચલણ ટ્રાફિક સેન્ટર ઉભું કરાયું છે.
અમદાવાદ ચીફ જ્યુડિશિયલ મેજિસ્ટ્રેટ કોર્ટમાં ગઈકાલે મંગળવારે ટ્રાફિક ઇ-ચલણ સેન્ટરનો હાઇકોર્ટના રજિસ્ટ્રાર જનરલ સંજય સુથારના હસ્તે પ્રારંભ કરાવ્યો હતો. ટ્રાફિકના નિયમોનું ઉલ્લંઘન કરનારા વાહનચાલકો સામે જનરેટ થતાં ઇ-મેમો મુજબ તેઓની પાસે મેમો ભરવાનો કે વર્ચ્યુઅલ મોડ દ્વારા વિરુદ્ધ અપીલ કરવાનો વિકલ્પ છે. મોબાઇલ નંબર અપડેટ ન હોય, ત્યાં અગાઉ ઈ-મેમો માત્ર પોલીસ કમિશનર ઓફિસ ખાતે ભરી શકાતો હતો. હાલમાં 24.72 લાખ ઈ-ચલણ પેન્ડિંગ છે. જેની કુલ રકમ 160 કરોડ થાય છે. આમ શહેરીજનો ટ્રાફિક ભંગના ગુનાનો દંડ ભરવામાં પણ આળસ રાખી રહ્યા છે.
શહેરની ઘી કાંટા કોર્ટમાં ઈ-ચલણ સેન્ટર શરૂ કરવાથી જે વાહનચાલકોના મેમો વર્ચ્યુઅલ કોર્ટમાં ગયા હશે એ આ સેન્ટરમાં મેમો ભરી શકશે. એમની સામેનો કેસ નીકળી જશે. સેન્ટર શરૂ થયાના પ્રથ દિવસે એટલે કે મંગળવારે કુલ રૂ.68 હજારનો દંડ લોકોએ ભર્યો હતો.