પાકિસ્તાનઃ સામાન્ય ચૂંટણી પૂર્વે બલુચિસ્તાન સહિત કેટલાક સ્થળોએ આતંકી હુમલો, 25ના મોતની આશંકા
નવી દિલ્હીઃ પાકિસ્તાનમાં સામાન્ય ચૂંટણીના એક દિવસ પહેલા બુધવારે અશાંત બલૂચિસ્તાન પ્રાંતમાં એક સ્વતંત્ર ઉમેદવારના ચૂંટણી કાર્યાલયની બહાર જોરદાર બોમ્બ વિસ્ફોટ થયો હતો. આ દરમિયાન 25 લોકો માર્યા ગયા અને 40 થી વધુ લોકો ઘાયલ થયા હોવાનું જાણવા મળે છે. બ્લાસ્ટ બલૂચિસ્તાનના પિશિન જિલ્લાના ખાનઝાઈ વિસ્તારમાં અપક્ષ ઉમેદવાર અસફંદ્યાર ખાન કાકરની ઓફિસની બહાર થયો હતો.
પંગુરના વરિષ્ઠ પોલીસ અધિકારી અબ્દુલ્લા ઝેહરીએ જણાવ્યું હતું કે, “અપક્ષ ઉમેદવાર અસફંદ્યાર ખાન કાકરની ઓફિસની બહાર જોરદાર બોમ્બ વિસ્ફોટ થયો હતો. આ ઘટનામાં ઓછામાં ઓછા 12 લોકો માર્યા ગયા હતા અને ઘણા લોકો ઘાયલ થયા હતા.પોલીસે જણાવ્યું હતું કે બોમ્બ ઉમેદવારના ચૂંટણી કાર્યાલયની બહાર ટાઈમર સાથે જોડાયેલ બેગમાં રાખવામાં આવ્યો હતો. પાકિસ્તાનમાં 8 ફેબ્રુઆરીએ સામાન્ય ચૂંટણી યોજાવાની છે અને તે પહેલા બલૂચિસ્તાનમાં હિંસા ચરમસીમાએ છે.
કહેવામાં આવી રહ્યું છે કે આ આત્મઘાતી હુમલો એક અપક્ષ ઉમેદવારના ચૂંટણી કાર્યાલય પર કરવામાં આવ્યો છે. પાકિસ્તાનમાં, મકરાન ડિવિઝન અને બલૂચિસ્તાનની પ્રાંતીય રાજધાનીનાં વિવિધ વિસ્તારોમાં ઉમેદવારોના કાર્યાલયો અને મતદાન મથકોને નિશાન બનાવીને ઓછામાં ઓછા નવ ગ્રેનેડ હુમલા કરવામાં આવ્યા હતા. પોલીસ અહેવાલો અનુસાર, મંગળવારે મોડી સાંજે ક્વેટાની બહાર કિલ્લી અહમદઝઈમાં એક સરકારી શાળામાં મોટરસાયકલ સવાર લોકોએ ગ્રેનેડ ફેંક્યા હતા. ડોનના અહેવાલ મુજબ શાળાના પ્રાંગણમાં ગ્રેનેડ વિસ્ફોટ થયો હતો, જેનાથી બારીઓને નુકસાન થયું હતું.
કાયદા અમલીકરણ એજન્સીઓએ પાસનીમાં સરકારી શાળા પરના હુમલાને નિષ્ફળ બનાવ્યો હતો, જ્યાં બાગ બજાર સરકારી શાળા પાસે વિસ્ફોટક મળી આવ્યું હતું. બાદમાં બોમ્બ ડિસ્પોઝલ સ્કવોડે તેને નિષ્ક્રિય કર્યો હતો. કેચ જિલ્લાના હોશબ વિસ્તારમાં નેશનલ ડેટાબેઝ અને રજીસ્ટ્રેશન ઓથોરિટીની ઓફિસ પર ગ્રેનેડથી હુમલો કરવામાં આવ્યો હતો, જેનાથી બારીઓને નુકસાન થયું હતું પરંતુ કોઈ ઈજા થઈ ન હતી. અન્ય ઘટનાઓમાં અવારન જિલ્લામાં નેશનલ એસેમ્બલી માટે બીએનપી-મેંગલના ઉમેદવાર મીર મોહમ્મદ યાકુબના નિવાસસ્થાન પર ગ્રેનેડ હુમલો અને બુલેદામાં પીએમએલ-એનના ઉમેદવાર મીર મોહમ્મદ અસલમ બુલેદીના ઘર પર હુમલો, ડોનના અહેવાલમાં સમાવેશ થાય છે.
