સૂર્યાનું ખરાબ ફોર્મ જોઈ પોન્ટિંગ હેરાન: યાદવને આપી ખાસ સલાહ
મેલબોર્ન, 6 જાન્યુઆરી 2026: વચ્ચે થોડા જ દિવસોમાં શરૂ થનારા ટી-20 વર્લ્ડ કપ પહેલા ભારતીય ટીમના કેપ્ટન સૂર્યકુમાર યાદવનું ફોર્મ ચિંતાનો વિષય બન્યું છે. ઓસ્ટ્રેલિયાના દિગ્ગજ ખેલાડી અને પૂર્વ કેપ્ટન રિકી પોન્ટિંગે સૂર્યાના કથળતા ફોર્મ પર આશ્ચર્ય વ્યક્ત કરવાની સાથે તેને આ સંકટમાંથી બહાર આવવા માટે ગુપ્ત મંત્ર આપ્યો છે.
વર્ષ 2025 સૂર્યકુમાર યાદવ માટે અત્યાર સુધી ઘણું નિરાશાજનક રહ્યું છે. આ વર્ષે રમાયેલી 21 મેચોમાં તે માત્ર 218 રન બનાવી શક્યો છે, જેમાં તેનો સ્ટ્રાઈક રેટ પણ ઘટીને 123.16 થઈ ગયો છે. ટી-20માં દુનિયાના નંબર-1 બેટ્સમેન ગણાતા ખેલાડી માટે આ આંકડા ચિંતાજનક છે, ખાસ કરીને જ્યારે ભારત ગત ચેમ્પિયન તરીકે વર્લ્ડ કપમાં ઉતરી રહ્યું હોય.
આઈસીસી રિવ્યુમાં વાત કરતા પોન્ટિંગે જણાવ્યું હતું કે, “સૂર્યાનું ફોર્મ મારા માટે મોટું આશ્ચર્ય છે. તે લાંબા સમયથી ભારતનો સૌથી ભરોસાપાત્ર ખેલાડી રહ્યો છે. મારી તેને સલાહ છે કે તે આઉટ થવાનો ડર છોડી દે અને માત્ર રન બનાવવા પર ધ્યાન આપે. તે ટ્રેવિસ હેડ જેવો ખેલાડી છે જેને ક્યારેય આઉટ થવાનો ડર નથી લાગતો. સૂર્યાએ ફરીથી પોતાનો આત્મવિશ્વાસ કેળવવો પડશે અને દુનિયાને બતાવવું પડશે કે તે શા માટે શ્રેષ્ઠ છે.”
- શુભમન ગિલને પડતો મુકાતા પોન્ટિંગ સ્તબ્ધ
ભારતીય ટીમની પસંદગી અંગે વાત કરતા પોન્ટિંગે શુભમન ગિલને વર્લ્ડ કપ સ્ક્વોડમાંથી બહાર રાખવાના નિર્ણય પર પણ સવાલ ઉઠાવ્યા હતા. પોન્ટિંગે કહ્યું, “મને વિશ્વાસ નથી આવતો કે ગિલ ટીમમાં નથી. મેં તેને ઇંગ્લેન્ડ સામેની ટેસ્ટ શ્રેણીમાં શાનદાર બેટિંગ કરતા જોયો હતો. જોકે, આ નિર્ણય એ પણ દર્શાવે છે કે ભારતીય ક્રિકેટમાં કેટલી પ્રતિભા (Depth) છે. ગિલ જેવા ખેલાડીને પણ જો ટીમમાં જગ્યા ન મળે, તો સમજી શકાય છે કે ભારતીય ટીમ કેટલી મજબૂત છે.”
