નાઈરોબી, 20 ઓગસ્ટ 2026: Safari helicopter crash in Kenya મધ્ય કેન્યાના સામ્બુરુ કાઉન્ટીમાં પ્રવાસીઓને લઈ જતું એક હેલિકોપ્ટર દુર્ઘટનાગ્રસ્ત થયું હતું. આ અકસ્માતમાં સવાર તમામ સાત લોકોના મોત થયા હતા. મૃતકોમાં ઈક્વાડોરના નેશનલ ઈન્ટેલિજન્સ સેન્ટરના વડા મિશેલ સેન્સી-કોન્ટુગી, તેમના પત્ની અને પાંચ અમેરિકન નાગરિકોનો સમાવેશ થાય છે.
કેન્યા સિવિલ એવિએશન ઓથોરિટી (KCAA) અનુસાર, આ ઘટના રાજધાની નૈરોબીની ઉત્તરે આવેલા સંબુરુ કાઉન્ટીમાં બની હતી. સ્થાનિક સમય મુજબ સવારે 09:13 વાગ્યે, જ્યારે વિમાન લોઇસાબા વાઇલ્ડલાઇફ રિઝર્વથી રવાના થયું ત્યારે આ અકસ્માત સર્જાયો હતો. ખરાબ હવામાન અને અંધારાને કારણે રાહત અને બચાવ કામગીરીમાં વિલંબ થયો હતો.
અંધારાને કારણે રાહત અને બચાવ કામગીરીમાં વિલંબ
બપોરે ‘X’ પર કેન્યા રેડ ક્રોસ દ્વારા શેર કરવામાં આવેલી તસવીરોમાં દુર્ઘટનાસ્થળ આગની લપેટમાં જોવા મળ્યું હતું. રેડ ક્રોસે જણાવ્યું હતું કે દુર્ગમ ભૂપ્રદેશને કારણે બચાવ કામગીરીમાં અવરોધ આવી રહ્યો હતો.
એરક્રાફ્ટ એક્સિડન્ટ ઇન્વેસ્ટિગેશન ડિપાર્ટમેન્ટ (AAID) ના નિયામક ફ્રેડરિક કાબુંગેના જણાવ્યા અનુસાર, હેલિકોપ્ટરમાં એક પાઇલટ અને છ મુસાફરો સવાર હતા અને તેમાં કોઈ બચી શક્યું ન હતું.
સાંબુરુ કાઉન્ટીના પોલીસ વડા ડેવિડ નાકોરોઈએ કહ્યું, “અંધારા અને અકસ્માત સ્થળની મુશ્કેલ પરિસ્થિતિઓને કારણે આ કામગીરી આવતીકાલ સુધી સ્થગિત કરવામાં આવી છે.”
પાંચ અમેરિકન નાગરિકોના મોત
યુએસ સ્ટેટ ડિપાર્ટમેન્ટના પ્રવક્તાએ જણાવ્યું હતું કે આ અકસ્માતમાં પાંચ અમેરિકી નાગરિકોનાં મોત થયાં છે, પરંતુ તેમણે તેમની ઓળખ જાહેર કરી ન હતી. જોકે, સ્પેનિશ ભાષાના પ્રસારણકર્તા ‘ટેલીમુંડો’ (Telemundo) એ જાહેરાત કરી હતી કે ફ્લોરિડામાં સ્થિત તેમના એક વરિષ્ઠ મેનેજર, જોસ આલ્બર્ટો સુઆરેઝનું આ દુર્ઘટનામાં અવસાન થયું છે.
ઈક્વાડોરના પરિવહન મંત્રી રોબર્ટો લુકેએ જણાવ્યું હતું કે મૃતકોમાં ગુપ્તચર વડા મિશેલ સેન્સી-કોન્ટુગી અને તેમની પત્નીનો સમાવેશ થાય છે. લુકેએ ‘X’ પર લખ્યું, “આજે, મિશેલ અને સ્ટેફની આપણને બહુ વહેલા છોડીને ચાલ્યા ગયા છે. મારી સંવેદનાઓ તેમના પરિવાર, ખાસ કરીને તેમના બાળકો અને માતા-પિતા સાથે છે.”
