મુંબઈઃ ભારતીય સિનેમાના વરિષ્ઠ ફિલ્મ નિર્માતા સલીમ અખ્તરનું 82 વર્ષની વયે અવસાન થયું છે. તેઓ છેલ્લા કેટલાક સમયથી વય સંબંધિત બીમારીઓથી પીડાતા હતા. અને મુંબઈની કોકિલાબેન ધીરુભાઈ અંબાણી હોસ્પિટલમાં સારવાર લઈ રહ્યા હતા.તેમના મૃત્યુની પુષ્ટિ તેમની પત્ની શમા અખ્તર દ્વારા કરવામાં આવી છે. સલીમ અખ્તરના પરિવારમાં તેમની પત્ની શમા અને પુત્ર સમદ અખ્તરનો સમાવેશ થાય છે. સલીમ અખ્તરે ફિલ્મ ઉદ્યોગમાં મહત્વપૂર્ણ યોગદાન આપ્યું છે. તેમણે ઘણા સ્ટાર્સને પ્લેટફોર્મ આપ્યું અને બોલિવૂડને યાદગાર ફિલ્મો આપી. તેમના નિધનથી ફિલ્મ જગતમાં શોકનું મોજું ફરી વળ્યું છે.
સલીમ અખ્તરે નિર્માતા તરીકે બોલિવૂડમાં ઘણી સુપરહિટ ફિલ્મો બનાવી છે. ‘ફૂલ ઔર અંગારે’ અને ‘કયામત’ જેવી સુપરહિટ ફિલ્મો બનાવવામાં સલીમ અખ્તરનો મોટો ફાળો હતો. આ ઉપરાંત, તેમણે 1997માં રિલીઝ થયેલી ફિલ્મ ‘રાજા કી આયેગી બારાત’નું નિર્માણ કરીને રાની મુખર્જીને ઉદ્યોગમાં લોન્ચ કરી હતી. આ ઉપરાંત, સલીમે ફિલ્મ ‘ચાંદ સા રોશન ચેહરા’ દ્વારા તમન્નાને હિન્દી સિનેમામાં રજૂ કરી હતી. સલીમ અખ્તરે ફિલ્મ ઉદ્યોગમાં નવી પ્રતિભાઓને પ્રોત્સાહન આપવામાં મૂલ્યવાન યોગદાન આપ્યું.
સલીમનું 8 એપ્રિલે મુંબઈની કોકિલાબેન ધીરુભાઈ અંબાણી હોસ્પિટલમાં અવસાન થયું હતું. ઘણા બોલિવૂડ કલાકારોએ સલીમને શ્રદ્ધાંજલિ આપી છે. બોલિવૂડના સુવર્ણ યુગના સાક્ષી અને ઘણી ગુણવત્તાયુક્ત ફિલ્મોનું નિર્માણ કરનાર સલીમના નિધન પર કલાકારોએ શોક વ્યક્ત કર્યો.