અમદાવાદઃ દુનિયામાં સૌથી મોટુ ક્રિકેટ સ્ટેડિયમ અમદાવાદમાં બનાવવામાં આવ્યું છે. દરમિયાન આગામી ફેબ્રુઆરી મહિનામાં અમદાવાદના સ્ટેડિયમમાં ભારત અને ઈંગ્લેન્ડ વચ્ચે ટેસ્ટ અને ટી-20 મેચનું આયોજન કરવામાં આવ્યું હોવાનું જાણવા મળે છે.
સુત્રોના જણાવ્યા અનુસાર ઈંગ્લેન્ડની ટીમ આગામી ફેબ્રુઆરી મહિનામાં ભારતના પ્રવાસે આવશે. પ્રવાસ દરમિયાન ઈંગ્લેન્ડની ટીમ ભારત સાથે ટેસ્ટ, વન-ડે અને ટી-20 ક્રિકેટ મેચ રમશે. જે પૈકી અમદાવાદમાં બે ટેસ્ટ અને 5 T20 મેચ રમાશે. આ ક્રિકેટ મેચને લઈને અમદાવાદના સ્ટેડિયમમાં તૈયારીઓ પણ શરૂ કરી દેવામાં આવી છે. બંને ટીમ વચ્ચે ત્રીજી અને ચોથી ટેસ્ટ અમદાવાદમાં રમાશે. ત્રીજી ટેસ્ટ મેચ પીંક બોલથી ડે-નાઈટ રમાશે.
ભારતના પ્રવાસ પહેલા ઈંગ્લેન્ડની ટીમ જાન્યુઆરી મહિનામાં શ્રીલંકાનો પ્રવાસ કરશે. જ્યાં બે ટેસ્ટ મેચ રમાશે. શ્રીલંકાના પ્રવાસ બાદ ફેબ્રુઆરીમાં ઈંગ્લેન્ડની ટીમ ભારતના પ્રવાસે આવશે.
