એશિયન ગેમ્સ 2023માં આ ભારતીય સ્ટાર હશે ધ્વજવાહક,નીરજ સહિત આ ભારતીયો પાસેથી ગોલ્ડની અપેક્ષા
મુંબઈ: એશિયન ગેમ્સ 2023નું આયોજન આ વખતે ચીનના હાંગઝોઉમાં કરવામાં આવી રહ્યું છે. આ ગેમ્સ 23 સપ્ટેમ્બરથી 8 ઓક્ટોબર વચ્ચે યોજાશે. ઓપનિંગ સેરેમની 23મીએ હાંગઝોઉમાં યોજાશે, જેમાં ભારતીય હોકી ટીમના કેપ્ટન હરમનપ્રીત સિંહ અને ઓલિમ્પિક મેડલ વિજેતા બોક્સર લવલીના બોરગોહેન ભારતીય ટીમના ધ્વજ વાહક હશે.
લવલીનાએ ટોક્યો ઓલિમ્પિકમાં 69 કિગ્રા વજન વર્ગમાં બ્રોન્ઝ મેડલ જીત્યો હતો. આ વર્ષે તેણે નવી દિલ્હીમાં મહિલા બોક્સિંગ ચેમ્પિયનશિપની 75 કિગ્રા ઈવેન્ટમાં ગોલ્ડ મેડલ જીત્યો હતો. સ્ટાર જેવલિન થ્રોઅર નીરજ ચોપરા 2018 જકાર્તા એશિયન ગેમ્સના ઓપનિંગ સેરેમનીમાં ધ્વજવાહક બન્યો હતો.
આ વખતે એશિયન ગેમ્સમાં કુલ 655 ભારતીય ખેલાડીઓ ભાગ લઈ રહ્યા છે, જે દેશની અત્યાર સુધીની સૌથી મોટી ટુકડી છે. પરંતુ આ વખતે જેવલિન થ્રોઅર નીરજ ચોપરા સહિત આ 5 ભારતીય સ્ટાર એથ્લેટ્સ એવા છે જેમની પાસેથી મેડલની ચોક્કસ આશા છે. આ લિસ્ટમાં મહિલા બોક્સર નિખત ઝરીન પણ ટોપ પર છે. ચાલો જાણીએ તેમના વિશે…
એશિયન ગેમ્સ 2018માં નીરજ ચોપરાએ ગોલ્ડ મેડલ જીત્યો હતો. તે આ વખતે પણ ગોલ્ડ માટે દાવેદાર છે. ગત વખતે તેણે જકાર્તા ગેમ્સમાં 88.06 મીટરના અંતરે બરછી ફેંકી હતી. તેણે વર્લ્ડ ચેમ્પિયનશિપ, ટોક્યો ઓલિમ્પિક્સ અને ડાયમંડ લીગમાં પણ ગોલ્ડ જીત્યો છે. તેનો સર્વશ્રેષ્ઠ વ્યક્તિગત થ્રો 89.94 મીટર છે
ભારતીય સ્ટાર મહિલા બોક્સર નિખત ઝરીન 50 કિગ્રા વજન વર્ગમાં વર્લ્ડ ચેમ્પિયનશિપ અને કોમનવેલ્થ ગેમ્સની ચેમ્પિયન રહી છે. જો કે તે પ્રથમ વખત એશિયન ગેમ્સમાં પ્રવેશી રહી છે, પરંતુ તેની પાસેથી ગોલ્ડની પૂરી અપેક્ષાઓ છે. જો 27 વર્ષીય નિખત એશિયન ગેમ્સ જીતશે તો તે પેરિસ ઓલિમ્પિક 2024 માટે પણ ક્વોલિફાય થઈ જશે.
ભારતીય પુરૂષ હોકી ટીમ છેલ્લે એશિયન ગેમ્સ 2018માં નિરાશ થઈ હતી. ટીમને બ્રોન્ઝ મેડલથી સંતોષ માનવો પડ્યો હતો. પરંતુ આ વખતે ભારતીય પુરુષ હોકી ટીમ જબરદસ્ત ફોર્મમાં છે અને તેની પાસેથી ગોલ્ડની પૂરી આશા છે. ગોલ્ડ જીત્યા બાદ ભારતીય હોકી ટીમને પેરિસ ઓલિમ્પિક 2024માં પણ સીધો પ્રવેશ મળશે.
ભારતીય પુરૂષ ક્રિકેટ ટીમ અને મહિલા ક્રિકેટ ટીમ બંને પ્રથમ વખત એશિયન ગેમ્સમાં પ્રવેશી રહી છે. એટલે કે આ બંને ટીમોની ડેબ્યૂ છે. પુરુષ ટીમની કમાન રુતુરાજ ગાયકવાડના હાથમાં છે, જ્યારે મહિલા ટીમની કમાન સ્મૃતિ મંધાના સંભાળી રહી છે. બંને ટીમો સીધી ક્વાર્ટર ફાઈનલ રમશે. આવી સ્થિતિમાં તેમને ગોલ્ડ માટે માત્ર 3-3 મેચ જીતવી પડશે.
બેડમિન્ટનમાં ભારતની સ્ટાર જોડી સાત્વિકસાઈરાજ રેન્કીરેડ્ડી અને ચિરાગ શેટ્ટી પોતાના ફુલ ફોર્મમાં છે. આ મેન્સ ડબલ્સમાં વિશ્વની નંબર-3 જોડી છે. તેણે ગયા વર્ષે ઈન્ડિયા ઓપનનું ટાઈટલ જીત્યું હતું. તેણે બર્મિંગહામ કોમનવેલ્થ ગેમ્સમાં ગોલ્ડ જીત્યો હતો. જ્યારે વર્લ્ડ ચેમ્પિયનશિપમાં ઐતિહાસિક બ્રોન્ઝ મેડલ જીત્યો હતો.
