દિલ્હી:પાકિસ્તાનના ઈસ્લામાબાદમાં ડેવિસ કપ વર્લ્ડ ગ્રુપ 1ની પ્લે-ઓફ મેચો રમાવાની છે. ભારતે 3 અને 4 ફેબ્રુઆરીએ યોજાનારી પાકિસ્તાન સામેની મેચ માટે છ સભ્યોની ટીમની જાહેરાત કરી છે. રામકુમાર રામનાથન, એન શ્રીરામ બાલાજી, યુકી ભામ્બરી, નિકી કાલિયાંડા પૂનાચા, સાકેત માઈનેની અને દિગ્વિજય પ્રતાપ સિંહને ટીમમાં સામેલ કરવામાં આવ્યા છે. જ્યારે દિગ્વિજય પ્રતાપ સિંહ રિઝર્વ ખેલાડી છે.
રામનાથન અને પૂનાચા સિંગલ્સ મેચ રમી શકે છે જ્યારે યુકી, બાલાજી અને માઈનેનીમાંથી કોઈપણ બેને ડબલ્સ મેચ માટે પસંદ કરી શકાય છે. રોહિત રાજપાલ ટીમનો નોન-પ્લેઈંગ કેપ્ટન હશે જ્યારે જીશાન અલી કોચની ભૂમિકા નિભાવશે.
ઓલ ઈન્ડિયા ટેનિસ એસોસિએશન (AITA) એ એક પ્રેસ રિલીઝમાં જણાવ્યું હતું કે પસંદગી સમિતિની બેઠકની અધ્યક્ષતા નંદન બાલ અને અન્ય સમિતિના સભ્યો બલરામ સિંહ, મુસ્તફા ઘોષ, સાઈ જયલક્ષ્મી, રાજપાલ, ઝીશાન અને સચિવ અનિલ ધુપર પણ હાજર હતા.
ભારતે છેલ્લે 1964માં પાકિસ્તાનનો પ્રવાસ કર્યો હતો અને 4-0થી જીત મેળવી હતી. ભારત આજ સુધી પાકિસ્તાન સામે ક્યારેય હાર્યું નથી. તેણે પાકિસ્તાન સામેની તમામ આઠ મેચ જીતી છે. ભારત અને પાકિસ્તાન વચ્ચે છેલ્લી મેચ 2019માં તટસ્થ સ્થળ પર રમાઈ હતી. ભારતે આ મેચ પણ 4-0થી જીતી લીધી હતી.
