રાજકોટ, 11 ફેબ્રુઆરી 2026: ગુજરાતમાં ગૃહિણીઓ સીઝનમાં અનાજ અને મરી-મસાલા 12 મહિના માટે ભરી લેતી હોય છે. ત્યારે હાલ મસાલા ભરવાની સીઝનના પ્રારંભે જ લાલ મરચાના ભાવ આસમાને પહોંચ્યા છે. એટલે કે ગયા વર્ષે લાલ મરચાના જે ભાવ હતા તે આ વખતે ડબલ થઈ ગયા છે. મરચાના ભાવ ₹3700થી વધીને ₹6450ની સપાટીએ પહોંચી ગયા છે. લાલ મરચાના ભાવમાં માત્ર એક જ માસમાં પ્રતિ 20 કિલોએ આશરે ₹1100થી ₹2000નો જંગી ઉછાળો નોંધાયો છે.
વર્ષ 2024માં દેશમાં અંદાજે 29 લાખ ટન લાલ મરચાનું ઉત્પાદન થયું છે, જેમાં ગુજરાતનો હિસ્સો 27 હજાર ટન રહ્યો છે. ગુજરાતમાં ગોંડલ સહિતના સ્થાનિક મરચાં તેની આગવી તીખાશ અને સ્વાદ માટે જાણીતા છે, આ વર્ષે પ્રતિકૂળ હવામાનને લીધે મરચાના ઉત્પાદનને અસર થઈ છે. એટલે યાર્ડમાં પણ ભાવમાં ઉછાળો જોવા મળી રહ્યો છે. આ વર્ષે સીઝન બરાબર જામી તે પહેલા જ સુકા મરચાના ભાવમાં જોરદાર તેજી જોવા મળી રહી છે. ગત વર્ષની સરખામણીએ મરચાના ભાવમાં બમણાથી પણ વધુનો વધારો થયો છે.
માર્કેટિંગ યાર્ડના સૂત્રોના જણાવ્યા અનુસાર, ફેબ્રુઆરી-2025માં સુકા મરચાના પ્રતિ 20 કિલોના જથ્થાબંધ ભાવ ₹800થી ₹2300ની રેન્જમાં હતા. આ ભાવ સતત વધતા રહીને એક મહિના પહેલા ₹2600થી ₹4400 સુધી પહોંચ્યા હતા. જોકે, માત્ર છેલ્લા એક મહિનામાં જ ભાવમાં તોતિંગ ઉછાળો આવ્યો છે અને 10 ફેબ્રુઆરી, 2026ના રોજ મરચાના ભાવ ₹3700થી વધીને ₹6450ની સપાટીએ પહોંચી ગયા છે.
લાલ મરચાના ભાવમાં માત્ર એક જ માસમાં પ્રતિ 20 કિલોએ આશરે ₹1100થી ₹2000નો જંગી ઉછાળો નોંધાયો છે. આ વધારાને કારણે છૂટક બજારમાં સારી ગુણવત્તાના મરચામાં પ્રતિ કિલોએ ₹50થી ₹100 સુધીનો ભાવવધારો જોવા મળ્યો છે. ઉલ્લેખનીય છે કે, દેશમાં આંધ્રપ્રદેશ આશરે 10 લાખ ટન સાથે મરચાનું સૌથી વધુ ઉત્પાદન કરતું રાજ્ય છે, પરંતુ આ વર્ષે પ્રતિકૂળ હવામાન, ક્લાયમેટ ચેન્જ અને કમોસમી વરસાદને કારણે મરચાના પાકને વ્યાપક નુકસાન થયું હોવાનું સૂત્રો જણાવી રહ્યા છે.
