લખનૌ, 18 ઓગસ્ટ 2026: ઉત્તર પ્રદેશ પોલીસે પોતાનું પહેલું સત્તાવાર ગીત (એન્થમ) ‘ખાકી કા સિતારા’ રિલીઝ કર્યું છે. આશરે સાડા છ મિનિટનો આ વીડિયો ઉત્તર પ્રદેશ પોલીસ દ્વારા સોશિયલ મીડિયા પ્લેટફોર્મ ‘એક્સ’ પર શેર કરવામાં આવ્યો છે. આ ગીતને બોલિવૂડના મહાનાયક અમિતાભ બચ્ચને પણ વખાણ્યું છે. અમિતાભ બચ્ચને પોતાના સોશિયલ મીડિયા હેન્ડલ પર આ એન્થમ રી-પોસ્ટ કરતા લખ્યું છે, “કુછ સિતારે આસમાન મેં ચમકતે હૈં… કુછ ખાકી પહેનકર જમીન પર. ખાકી કા સિતારા.”
આ ખાસ એન્થમમાં બોલિવૂડના દિગ્ગજોનું મોટું યોગદાન રહ્યું છે. ગીતને બોલિવૂડના મહાનાયક અમિતાભ બચ્ચનનો અવાજ, પદ્મશ્રી શંકર મહાદેવનનું સંગીત અને સ્વર તેમજ જાણીતા કવિ-ગીતકાર આલોક શ્રીવાસ્તવના શબ્દો દ્વારા તૈયાર કરવામાં આવ્યું છે. આ ગીતને ઉત્તર પ્રદેશના મુખ્યમંત્રી યોગી આદિત્યનાથે લખનૌના લોક ભવન ખાતે લોન્ચ કર્યું હતું. આ ગીતના રિલીઝ વીડિયોમાં ઉત્તર પ્રદેશ પોલીસની કાયદો અને વ્યવસ્થા, મહિલા સુરક્ષા, ટ્રાફિક મેનેજમેન્ટ, આપત્તિ રાહત (ડિઝાસ્ટર રિલીફ) અને જનસેવા સાથે જોડાયેલી વિવિધ કામગીરીઓને પ્રભાવશાળી રીતે રજૂ કરવામાં આવી છે.
એક વર્ષથી વધુ સમયમાં થયું શૂટિંગ
આ એન્થમ ઉત્તર પ્રદેશ પોલીસનું ઇન-હાઉસ ક્રિએટિવ પ્રોડક્શન છે, જેને તૈયાર કરવામાં એક વર્ષથી વધુ સમય લાગ્યો છે. આનું ફિલ્માંકન મહાકુંભ દરમિયાન શરૂ થયું હતું અને સ્વતંત્રતા દિવસ સુધી ચાલ્યું હતું. ફુટેજમાં પોલીસકર્મીઓને મહાકુંભ વ્યવસ્થા, કાયદો અને વ્યવસ્થા, મહિલા સુરક્ષા, ટેક્નોલોજી, ડિઝાસ્ટર મેનેજમેન્ટ અને દૈનિક પોલીસિંગ જેવી વિવિધ ઓપરેશનલ પરિસ્થિતિઓમાં બતાવવામાં આવ્યા છે.
આ લોન્ચિંગ ઇવેન્ટમાં શંકર મહાદેવન, પદ્મશ્રી નાના પાટેકર, આલોક શ્રીવાસ્તવ, આનંદ તેમજ ફિલ્મ અને મ્યુઝિક ઇન્ડસ્ટ્રીના સભ્યો અને વરિષ્ઠ આઈપીએસ (IPS) અધિકારીઓ ઉપસ્થિત રહ્યા હતા. આ પ્રોજેક્ટનો કોન્સેપ્ટ, કો-રાઇટિંગ અને ક્રિએટિવ ડિરેક્શન રાહુલ શ્રીવાસ્તવ (IPS, PRO, UP પોલીસ) દ્વારા કરવામાં આવ્યું છે.
