નવી દિલ્હીઃ પાકિસ્તાન અને પાકિસ્તાન કબજા હેઠળના કાશ્મીરમાં નવ આતંકવાદી ઠેકાણાઓ સામે ભારતીય સશસ્ત્ર દળો દ્વારા કરવામાં આવેલી કાર્યવાહી માટે વડા પ્રધાન નરેન્દ્ર મોદીએ ‘ઓપરેશન સિંદૂર’ નામ પસંદ કર્યું હતું. આતંકવાદીઓ દ્વારા 26 નાગરિકોની હત્યા બાદ, ઘણા પીડિતોની પત્નીઓની તસવીરોએ સમગ્ર દેશમાં શોકની લહેર ફેલાવી દીધી હતી, એમ સત્તાવાર સૂત્રોએ જણાવ્યું હતું. તેથી, બદલો લેવા માટે ‘ઓપરેશન સિંદૂર’ નામ સૌથી યોગ્ય માનવામાં આવ્યું છે.
હકીકતમાં, 22 એપ્રિલના રોજ, જમ્મુ અને કાશ્મીરના પહેલગામમાં, આતંકવાદીઓએ પ્રવાસીઓનો ધર્મ પૂછીને ક્રૂરતાથી હત્યા કરી દીધી હતી. આતંકવાદી હુમલામાં ઘણી સ્ત્રીઓએ પોતાના પતિ ગુમાવ્યા હતા. આ ક્રૂર આતંકવાદી હુમલાનો બદલો લેવા માટે, ભારતે 15 દિવસ પછી પાકિસ્તાન અધિકૃત કાશ્મીર (POJK) માં નવ આતંકવાદી છાવણીઓનો નાશ કર્યો હતો. ભારતીય સશસ્ત્ર દળોએ આ ઓપરેશનને ‘ઓપરેશન સિંદૂર’ નામ આપ્યું હતું.
22 એપ્રિલે પહેલગામની બૈસરન ખીણમાં આતંકવાદીઓએ ગોળીબાર કરીને પ્રવાસીઓની હત્યા કરી હતી. આ હુમલામાં 25 ભારતીયો અને એક નેપાળી યુવાન માર્યા ગયા હતા. હુમલા દરમિયાન, આતંકવાદીઓએ ફક્ત પુરુષોને તેમનો ધર્મ પૂછીને માર્યા હતા. આ હુમલા પછી ભારત અને પાકિસ્તાન વચ્ચે તણાવ ચરમસીમાએ હતો. પાકિસ્તાનને પાઠ ભણાવવા માટે, ભારતે સિંધુ જળ સંધિને સસ્પેન્ડ કરવાથી લઈને પાકિસ્તાની નાગરિકોના વિઝા રદ કરવા સુધીના અનેક પ્રતિબંધો લાદ્યા હતા. આ હુમલાની વૈશ્વિક સ્તરે પણ નિંદા કરવામાં આવી હતી.
પહેલગામના ગુનેગારો અને કાવતરાખોરોને પાઠ ભણાવવા માટે ભારતીય વાયુસેના આજે પાકિસ્તાન સરહદ પર મોટા પાયે યુદ્ધ અભ્યાસ કરવા જઈ રહી છે ત્યારે ભારતે આ કાર્યવાહી કરી છે. આમાં રાફેલ, મિરાજ-2000, તેજસ અને સુખોઈ-30 જેવા તમામ ફ્રન્ટલાઈન ફાઈટર એરક્રાફ્ટનો સમાવેશ થશે. તે જ સમયે, દેશના 259 સંવેદનશીલ જિલ્લાઓમાં નાગરિક સુરક્ષાનું પરીક્ષણ કરવા માટે મોક ડ્રીલ યોજવામાં આવશે.
સૂત્રો કહે છે કે વાયુસેનાના અભ્યાસમાં AWACS વાયુ સંરક્ષણ પ્રણાલી પણ સામેલ થશે. આ સમયગાળા દરમિયાન, વાયુસેના જમીન અને હવામાં દુશ્મનના લક્ષ્યોને નષ્ટ કરવાની તેની ક્ષમતાનું પરીક્ષણ કરશે. કેન્દ્ર સરકારે સરહદી કવાયતો માટે એરમેનને નોટિસ (NOTEM) જારી કરી છે. આ નોટિસ ચોક્કસ વિસ્તારમાં ફ્લાઇટ્સ અંગે સાવધાની રાખવા માટે જારી કરવામાં આવી છે.
NOTAM મુજબ, વાયુસેનાનો આ અભ્યાસ આજે બપોરે 3:30 વાગ્યાથી 8 મેના રોજ રાત્રે 9:30 વાગ્યા સુધી ચાલશે. આ સમયગાળા દરમિયાન મુસાફરોની ફ્લાઇટ્સ પર પ્રતિબંધ રહેશે. હવાઈ ક્ષેત્ર પર પ્રતિબંધનો હેતુ ભારતીય વાયુસેનાની વિવિધ પ્રવૃત્તિઓને સરળ બનાવવાનો છે જેમાં યુદ્ધ તૈયારીના ભાગ રૂપે ફાઇટર જેટ, સર્વેલન્સ એરક્રાફ્ટ અને અન્ય હવાઈ કામગીરીનો સમાવેશ થાય છે.