રાજકોટ,13 જાન્યુઆરી 2026: રાજ્યમાં હાઈવે પર અકસ્માતોના બનાવો વધી રહ્યા છે. ત્યારે જેતપુર-ધોરાજી નેશનલ હાઇવે પર વધુ એક અકસ્માત સર્જાયો હતો. ગત મોડીરાત્રે પૂરઝડપે જતી એક કારનું ટાયર ફાટી જતાં કાર ફંગોળાઇ હતી. આ કારમાં સવાર દંપતી પૈકી પત્નીનું ઘટનાસ્થળે જ મોત નિપજ્યુ હતુ. જ્યારે ગંભીર રીતે ઇજાગ્રસ્ત પતિને સારવાર માટે હોસ્પિટલમાં ખસેડાયો છે. જ્યા તેની સ્થિતિ નાજુક હોવાનું કહેવાય છે. આ દંપતીના 13 ફેબ્રુઆરી 2025ના રોજ લગ્ન થયાં હતાં, લગ્નના 11 મહિને જ બંનેનો સાથ છૂટી ગયો છે.
આ અકસ્માતના બનાવની વિગત એવી છે કે, ધોરાજીના 25 વર્ષીય શુભમ મહેશભાઈ કાપડિયા તેમની 23 વર્ષીય પત્ની મિતાલી સાથે હોન્ડા સિટી કારમાં જેતપુરથી ધોરાજી જઈ રહ્યા હતા. આ દરમિયાન એકવાટિક વોટર પાર્ક નજીક અચાનક કારનું ટાયર ફાટતાં સ્ટીયરિંગ પરથી કાબૂ ગુમાવ્યો હતો. કાર પૂરઝડપે રોડની સાઈડમાં આવેલા ઝાડ સાથે અથડાઈ હતી. અકસ્માત એટલો ગંભીર હતો કે હોન્ડા સિટી કારનો ફુરચેફુરચા બોલી ગયા હતા અને કારનું એક ટાયર પણ નીકળીને દૂર ફંગોળાઈ ગયું હતું. આ સમગ્ર ઘટના સીસીટીવી કેમેરામાં કેદ થઈ છે, જેમાં કાર ઝાડ સાથે અથડાતી સ્પષ્ટ જોઈ શકાય છે. અકસ્માતનો અવાજ સાંભળી આસપાસના લોકો ઘટનાસ્થળે દોડી આવ્યા હતા અને કારમાં ફસાયેલાં દંપતીને ભારે જહેમત બાદ બહાર કઢાયા હતા.
આ અકસ્માતમાં 23 વર્ષીય મિતાલીબેનનું ઘટનાસ્થળે જ મૃત્યુ નીપજ્યું હતું. જ્યારે પતિ શુભમ કાપડિયાને ગંભીર ઇજાઓ પહોંચતાં તેમને વધુ સારવાર અર્થે જૂનાગઢ ખસેડવામાં આવ્યા છે, જ્યાં તેમની હાલત ગંભીર હોવાનું જાણવા મળ્યું છે.
અકસ્માતનો ભોગ બનેલાના પરિવારજનોના કહેવા મુજબ શુભમ અને મિતાલીનાં લગ્ન ગત 13 ફેબ્રુઆરી 2025ના રોજ થયાં હતાં. આજે 13 જાન્યુઆરીએ જ આ દંપતીના લગ્નને 11 મહિના પૂર્ણ થયા હતા. જે દિવસે ખુશીનો માહોલ હોવો જોઈએ એ જ દિવસે કાપડિયા પરિવાર પર દુઃખનો પહાડ તૂટી પડ્યો છે. શુભમ બે ભાઈમાં મોટા હતો અને પરિવારનો આશાસ્પદ યુવક હતો. આ અકસ્માતના સમાચાર વાયુવેગે પ્રસરતાં ધોરાજી શહેરમાં અને કાપડિયા પરિવારમાં શોકનું મોજું ફરી વળ્યું છે.