ડેન્ડ્રફની સમસ્યાથી છો પરેશાન? અપનાવો આ 4 ઘરગથ્થુ ઉપચાર

શિયાળાની ગુલાબી ઠંડી પોતાની સાથે અનેક સૌંદર્ય સમસ્યાઓ પણ લઈને આવે છે. જેમાં સ્કેલ્પમાં થતો ખોડો એટલે કે ડેન્ડ્રફ સૌથી સામાન્ય અને કંટાળાજનક સમસ્યા છે. માથામાં સતત ખંજવાળ આવવી, વાળ ખરવા અને ખભા પર જામી જતા સફેદ કણોને કારણે ઘણીવાર જાહેરમાં શરમજનક સ્થિતિમાં મુકાવું પડે છે. જો તમે પણ મોંઘા એન્ટી-ડેન્ડ્રફ શેમ્પૂ વાપરીને થાકી ગયા હોવ, તો રસોડામાં જ રહેલી વસ્તુઓથી તમે આ સમસ્યાને જડમૂળમાંથી દૂર કરી શકો છો.

• ડેન્ડ્રફ મુક્તિ માટેના 4 અસરકારક હેર માસ્ક

લીમડો અને આમળાનો પાવરફુલ માસ્ક: લીમડો બેક્ટેરિયાનો નાશ કરે છે અને આમળા સ્કેલ્પને ઊંડું પોષણ આપે છે.

બનાવવાની રીતઃ તાજા લીમડાના પાનની પેસ્ટમાં 2 ચમચી આમળાનો પાવડર અને થોડું ગુલાબજળ ઉમેરી 40 મિનિટ સુધી વાળમાં લગાવી રાખો. આ માસ્ક ખંજવાળથી તાત્કાલિક રાહત અપાવશે.

એપલ સિન્ડર વિનેગર (ACV) અને મધ: વિનેગર સ્કેલ્પના મૃત કોષો સાફ કરે છે, જ્યારે મધ મોઇશ્ચરાઇઝરનું કામ કરે છે.

બનાવવાની રીતઃ 2 ચમચી વિનેગરમાં 1 ચમચી મધ મિક્સ કરી સ્કેલ્પ પર 20 મિનિટ રહેવા દો અને ઠંડા પાણીથી ધોઈ લો. આ ઉપાયથી સ્કેલ્પના છિદ્રો સાફ થશે.

દહીં અને લીંબુનો ચમત્કારી માસ્ક: દહીંમાં રહેલું લેક્ટિક એસિડ સ્કેલ્પનું pH લેવલ જાળવે છે, જ્યારે લીંબુ એન્ટી-ફંગલ તરીકે કામ કરે છે.

બનાવવાની રીતઃ 3 ચમચી દહીંમાં અડધા લીંબુનો રસ ભેળવી સ્કેલ્પ પર 30 મિનિટ લગાવો અને ત્યારબાદ હળવા શેમ્પૂથી ધોઈ લો. અઠવાડિયામાં બે વાર આ પ્રયોગ કરવાથી વાળમાં કુદરતી ચમક આવશે.

કેળું અને ઓલિવ ઓઇલ હેર પેક: જો તમારી સ્કેલ્પ ડ્રાય (સૂકી) હોય તો આ માસ્ક બેસ્ટ છે.

બનાવવાની રીતઃ એક પાકા કેળાને મેશ કરી તેમાં એક ચમચી ઓલિવ ઓઇલ ઉમેરો. આ મિશ્રણને 45 મિનિટ વાળમાં રહેવા દો. કેળામાં રહેલા વિટામિન્સ સ્કેલ્પને સ્વસ્થ બનાવશે.

• આ બાબતોનું પણ રાખો ધ્યાન

ઠંડા વાતાવરણમાં ખૂબ ગરમ પાણીથી માથું ન ધોવું, નવશેકા પાણીનો ઉપયોગ કરવો. ભીના વાળમાં ક્યારેય કાંસકો ન ફેરવવો. આહારમાં પૂરતા પ્રમાણમાં પાણી અને લીલા શાકભાજીનો સમાવેશ કરવો.

આ સરળ અને કુદરતી ઉપચારો માત્ર ડેન્ડ્રફ જ નહીં દૂર કરે, પરંતુ તમારા વાળને રેશમી અને મજબૂત પણ બનાવશે.