બાળકોને ખાવામાં સેન્ડવિચ ખૂબ જ પ્રિય હોય છે. જો તેને હેલ્ધી અને પૌષ્ટિક બનાવવામાં આવે, તો તે સ્વાદની સાથે-સાથે સ્વાસ્થ્ય માટે પણ ઉત્તમ સાબિત થઈ શકે છે. રંગ-બેરંગી શાકભાજીઓથી તૈયાર થતી વેજ સેન્ડવિચ દેખાવમાં પણ આકર્ષક લાગે છે, જેથી બાળકો તેને હોંશે-હોંશે ખાઈ લે છે. બાળકોને શાકભાજી ખવડાવવાની આ એક સરળ રીત છે. જો સફેદ બ્રેડને બદલે હોલ વ્હીટ, મલ્ટીગ્રેન, ઓટ્સ કે મિલેટ (બાજરી કે જુવાર) બ્રેડનો ઉપયોગ કરવામાં આવે, તો સેન્ડવિચમાં ફાઈબર અને અન્ય જરૂરી પોષક તત્વોનું પ્રમાણ વધી જાય છે.
વેજ સેન્ડવિચમાં ગાજર, બીટ, પાલક, કેપ્સિકમ, સ્વીટ કોર્ન, કાકડી અને પનીર જેવી હેલ્ધી વસ્તુઓ ઉમેરી શકાય છે. તેમાં વિટામિન્સ, મિનરલ્સ, ફાઈબર, પ્રોટીન અને કેલ્શિયમ જેવા આવશ્યક પોષક તત્વો ભરપૂર માત્રામાં મળી રહે છે, જે બાળકોની વધતી ઉંમરમાં શારીરિક વિકાસ માટે ખૂબ જ ફાયદાકારક છે. આ સેન્ડવિચ સ્કૂલના ટિફિન બોક્સ, સવારના નાસ્તા કે સાંજની હળવી ભૂખ માટે ઉત્તમ વિકલ્પ છે. આવો જાણીએ બાળકો માટે 4 રંગ-બેરંગી અને હેલ્ધી વેજ સેન્ડવિચ બનાવવાની સરળ રીત.
રેઈનબો વેજ સેન્ડવિચ
હોલ વ્હીટ બ્રેડ પર ઘટ્ટ દહીં લગાવો. તેના પર છીણેલું ગાજર, કાકડી, લાલ, પીળી અને કેપ્સિકમ તથા ટામેટાંના ટુકડા ઉમેરો. ઉપરથી થોડું કાળું મીઠું અને કાળા મરીનો પાવડર છાંટીને બીજી બ્રેડથી સેન્ડવિચ બંધ કરો. આ સેન્ડવિચ વિટામિન્સ, ફાઈબર અને એન્ટીઓક્સિડન્ટ્સથી ભરપૂર હોય છે.
કોર્ન-ચીઝ વેજ સેન્ડવિચ
બાફેલા સ્વીટ કોર્નમાં થોડું છીણેલું ચીઝ, બારીક સમારેલી શિમલા મરચી, ટામેટાં અને તાજી કોથમીર મિક્સ કરો. આ મિશ્રણને હોલ વ્હીટ અથવા મલ્ટીગ્રેન બ્રેડ પર ફેલાવીને હળવું ટોસ્ટ કરી લો. સ્વીટ કોર્ન શરીરને ફાઈબર આપે છે, જ્યારે ચીઝ કેલ્શિયમ અને પ્રોટીનનો સારો સ્ત્રોત છે, જે બાળકોના હાડકાં મજબૂત કરવા માટે ગુણકારી છે.
પાલક-પનીર સેન્ડવિચ
બારીક સમારેલી પાલક, મેશ કરેલું પનીર અને થોડું છીણેલું ગાજર એકત્રિત કરો. તેમાં સ્વાદ મુજબ મીઠું અને કાળા મરી ઉમેરીને હોલ વ્હીટ બ્રેડ પર લગાવો અને સેન્ડવિચને હળવા તેલ કે માખણમાં શેકી લો. પાલકમાં આયર્ન અને વિટામિન્સ પ્રચૂર માત્રામાં હોય છે, જ્યારે પનીર પ્રોટીન અને કેલ્શિયમ પૂરું પાડે છે, જે બાળકોના સર્વાંગી વિકાસમાં મદદ કરે છે.
બીટ વેજ સેન્ડવિચ
બાફેલા અને છીણેલા બીટમાં ઘટ્ટ દહીં, છીણેલું ગાજર અને થોડો કાળા મરીનો પાવડર મિક્સ કરો. આ તૈયાર મિશ્રણને મલ્ટીગ્રેન બ્રેડ પર લગાવીને સ્વાદિષ્ટ સેન્ડવિચ બનાવો. બીટમાં ફોલેટ અને એન્ટીઓક્સિડન્ટ્સ રહેલા છે, જ્યારે ગાજર વિટામિન ‘એ’ નો ઉત્તમ સ્ત્રોત છે, જે આંખો અને સ્વાસ્થ્ય માટે ફાયદાકારક છે.
બાળકો માટે સેન્ડવિચ બનાવતી વખતે કઈ બાબતોનું ધ્યાન રાખવું?
સેન્ડવિચ બનાવવા માટે હંમેશાં તાજી અને સારી રીતે ધોયેલી શાકભાજીનો જ ઉપયોગ કરવો. મેદાવાળી સફેદ બ્રેડના બદલે હંમેશાં હેલ્ધી વિકલ્પો જેવા કે હોલ વ્હીટ, મલ્ટીગ્રેન, ઓટ્સ કે મિલેટ બ્રેડ પસંદ કરવી. સેન્ડવિચમાં વધારે પડતું મીઠું, સોસ કે મેયોનેઝ નાખવાનું ટાળવું. જો ક્રીમી ટેક્સચર જોઈતું હોય, તો મેયોનેઝને બદલે ઘટ્ટ દહીંનો ઉપયોગ કરવો વધુ હિતાવહ છે. શાકભાજીઓને ખૂબ મોટી ન કાપવી, જેથી બાળકોને ખાવામાં સરળતા રહે. જો તમે સ્કૂલના ટિફિન માટે સેન્ડવિચ બનાવી રહ્યા હોવ, તો એવી શાકભાજી પસંદ કરવી જેનાથી બ્રેડ જલ્દી પલળી ન જાય. સ્વચ્છતાનો સંપૂર્ણ ખ્યાલ રાખવો અને હંમેશાં તાજી સેન્ડવિચ બનાવીને જ બાળકોને ખાવા માટે આપવી.
