તેહરાન, 28 સપ્ટેમ્બર 2026: મધ્ય પૂર્વમાં વધી રહેલા ભારે તણાવ વચ્ચે ઈરાનના ‘ઈસ્લામિક રિવોલ્યુશનરી ગાર્ડ કોર્પ્સ’ (IRGC)ની નૌકાદળે દાવો કર્યો છે કે તેમણે હોર્મુઝની સામુદ્રધુનીમાંથી અમેરિકાનું અત્યાધુનિક માનવરહિત અંડરવોટર વ્હીકલ (યુએવી) ‘રેમસ 600’ કબજે કર્યું છે. ઈરાની સરકારી મીડિયા ‘IRIB’ના અહેવાલ મુજબ, અમેરિકન મિલિટરી દ્વારા આ સબમર્સિબલનો ઉપયોગ વ્યૂહાત્મક રીતે અત્યંત મહત્વપૂર્ણ એવા આ જળમાર્ગમાં જાસૂસી કરવા માટે કરવામાં આવી રહ્યો હતો.
IRGC નૌકાદળે જણાવ્યું હતું કે, તેમની વિશેષ ટીમે લશ્કરી ગુપ્તચર માહિતી અને ઈલેક્ટ્રોનિક વોરફેર ક્ષમતાઓનો ઉપયોગ કરીને એક અત્યંત જટિલ અને સુયોજિત ઓપરેશન પાર પાડ્યું હતું. ઈરાની અધિકારીઓના જણાવ્યા અનુસાર, ‘રેમસ ૬૦૦’ નામનું આ હાઈ-ટેક આર્ટિફિશિયલ ઈન્ટેલિજન્સ આધારિત સબમર્સિબલ હાલ ઈરાની લશ્કરી નિષ્ણાતોના કબજામાં છે. આ ટેકનિકલ ટીમ હવે તે વ્હીકલની સિસ્ટમનું વિશ્લેષણ કરીને તેમાં સંગ્રહિત ગુપ્ત ડેટા પુનઃપ્રાપ્ત કરવાની કામગીરી કરી રહી છે.
આ કાર્યવાહી સાથે જ IRGCએ હોર્મુઝની સામુદ્રધુનીમાંથી દરિયાઈ વાહનવ્યવહાર અંગે પોતાનું વલણ વધુ સખત બનાવ્યું છે. ઈરાને પુનરોચ્ચાર કર્યો છે કે આ મહત્વપૂર્ણ દરિયાઈ માર્ગ બંધ છે અને કોઈપણ અનાધિકૃત અથવા શંકાસ્પદ હલચલ સામે કડક સૈન્ય કારવાઈ સતત ચાલુ રહેશે. અમેરિકા અને ઈઝરાયેલ સાથે ચાલી રહેલા સંઘર્ષ વચ્ચે ઈરાનના રાષ્ટ્રપતિ મસૂદ પેઝેશ્કિયાને સ્પષ્ટ કર્યું છે કે તેહરાન પોતાના વલણ પર મક્કમ રહેશે અને પીછેહઠ નહીં કરે.
ઉલ્લેખનીય છે કે, સંયુક્ત રાષ્ટ્ર મહાસભા દરમિયાન ઈરાને યુદ્ધવિરામ અને હોર્મુઝ જળમાર્ગ ફરી ખોલવા માટે સાત દિવસનો રોડમેપ પ્રસ્તાવિત કર્યો હતો. આ પ્રસ્તાવ હેઠળ અમેરિકા ઈરાની બંદરોની નાકાબંધી હટાવે, તેલ નિકાસ પરના પ્રતિબંધોમાં છૂટછાટ આપે અને ફ્રીઝ કરેલી $12 અબજ ડોલરની ઈરાની સંપત્તિ મુક્ત કરે તેવી શરતો હતી. પરંતુ અમેરિકી પ્રમુખ ડોનાલ્ડ ટ્રમ્પે આ સાત દિવસના યુદ્ધવિરામ પ્રસ્તાવને ફગાવી દીધો છે. ન્યૂ યોર્કથી પરત ફર્યા બાદ રાષ્ટ્રપતિ પેઝેશ્કિયાને દેશવાસીઓને સંબોધતા જણાવ્યું હતું કે, ઈરાન પોતાના સાર્વભૌમત્વની રક્ષા માટે આખરી શ્વાસ સુધી અડીખમ ઊભું રહેશે.
