હૈદરાબાદ, 07 ઓક્ટોબર 2026: તેલંગાણાના રંગા રેડ્ડી જિલ્લામાં એક ભયાનક માર્ગ અકસ્માત સર્જાયો હતો. પૂરપાટ ઝડપે આવતી એક કાર મોટરસાયકલ સાથે અથડાઈ હતી. આ અકસ્માતમાં એક જ પરિવારના ત્રણ સભ્યોના મોત થયા હતા. આ ઘટના રંગા રેડ્ડી જિલ્લાના ચેવેલ્લા મંડળમાં ગોલ્લાપલ્લી નજીક બની હતી.
એક જ પરિવારના ત્રણ સભ્યોનાં મૃત્યુ
મોઈનાબાદ મંડળના મેડીપલ્લી ગામના રહેવાસી આ પરિવારના સભ્યો એક પારિવારિક કાર્યક્રમમાં હાજરી આપવા માટે ચાનવેલ્લી ગયા હતા. કાર્યક્રમ બાદ ઘરે પરત ફરતી વખતે આ અકસ્માત સર્જાયો હતો.
મધુ, સાવિત્રી અને ધનુષને ગંભીર ઈજાઓ થઈ હતી અને તેઓ ઘટનાસ્થળે જ મૃત્યુ પામ્યા હતા. દરમિયાન, મધુ અને સાવિત્રીની પુત્રી અક્ષિતા આ અકસ્માતમાં ઘાયલ થઈ હતી પરંતુ બચી ગઈ હતી; તેને સારવાર માટે ચેવેલ્લા સરકારી હોસ્પિટલમાં લઈ જવામાં આવી હતી.
રંગા રેડ્ડી જિલ્લામાં બનેલી આ દુર્ઘટનાનો એક વીડિયો પણ સામે આવ્યો છે. જ્યારે મોટરસાઇકલ સવારો રસ્તો ઓળંગી રહ્યા હતા, ત્યારે પાછળથી આવતી એક પૂરપાટ ઝડપે દોડતી કાર તેમની સાથે અથડાઈ હતી. કાર એટલી ઝડપથી આવી રહી હતી કે ટક્કરને કારણે સવારો મોટરસાઇકલ પરથી હવામાં ફંગોળાઈ જતા જોવા મળ્યા હતા. આ ઘટના સીસીટીવીમાં કેદ થઈ ગઈ હતી.
પોલીસે શંકાસ્પદ ‘હિટ-એન્ડ-રન’ની ઘટનામાં સામેલ વાહનની ઓળખ કરવા માટે કેસ નોંધીને તપાસ શરૂ કરી છે.
વધુ વાંચો: બેંગલુરુમાં CJPનું ‘ચપ્પલ પ્રોટેસ્ટ’નું એલાન, અભિનેતા પ્રકાશ રાજ પણ જોડાશે
