નવી દિલ્હી, 19 ઓક્ટોબર 2026: ડાયરેક્ટોરેટ ઓફ રેવેન્યુ ઈન્ટેલિજન્સએ સુઆયોજિત, ઇન્ટેલિજન્સ-આધારિત કામગીરી દ્વારા નાર્કોટિક્સની તસ્કરી સામેની પોતાની કાર્યવાહી સઘન બનાવી છે, જેના પરિણામે બે અલગ-અલગ કામગીરીમાં આશરે 7.1 કિલોગ્રામ એમ્ફેટામાઈન અને ત્રીજી કામગીરીમાં આશરે 3.1 કિલોગ્રામ કોકેઈન જપ્ત કરવામાં આવ્યું છે, તેમજ ત્રણ લોકોની ધરપકડ કરવામાં આવી છે. આ જપ્તી કેમ્પેગૌડા આંતરરાષ્ટ્રીય એરપોર્ટ, બેંગલુરુ; નાગપુર નજીક; અને ઈન્દિરા ગાંધી આંતરરાષ્ટ્રીય એરપોર્ટ , નવી દિલ્હી ખાતે કરવામાં આવી હતી.
ચોક્કસ બાતમીના આધારે કાર્યવાહી કરીને, ડીઆરઆઈના અધિકારીઓએ 14 ઓક્ટોબર 2026 ના રોજ દિલ્હીથી કેમ્પેગૌડા આંતરરાષ્ટ્રીય એરપોર્ટ, બેંગલુરુ ખાતે આવી પહોંચેલા એક મુસાફરને અટકાવ્યો હતો. મુસાફરના સામાનની તપાસ કરતા 5.166 કિલોગ્રામ એમ્ફેટામાઈન મળી આવ્યું હતું. રિકવર કરાયેલો પદાર્થ નાર્કોટિક ડ્રગ્સ એન્ડ સાયકોટ્રોપિક સબસ્ટન્સ એક્ટ, 1985 ની જોગવાઈઓ હેઠળ જપ્ત કરવામાં આવ્યો હતો અને મુસાફરની ધરપકડ કરવામાં આવી હતી.
બે દિવસ પછી, અન્ય એક ઇન્ટેલિજન્સ-આધારિત કામગીરીમાં, ડીઆરઆઈના અધિકારીઓએ નાગપુરના સીમાડે આવેલા સાવનેરના ખાપા ફાટા નજીક દિલ્હીથી હૈદરાબાદ બસમાં મુસાફરી કરી રહેલા એક ભારતીય નાગરિકને અટકાવ્યો હતો. તેના બેકપેક (પીઠ પર ભરાવવાની બેગ) ની તપાસ કરતા નવા લેડીઝ સૂટની અંદર છુપાવેલો સફેદ સ્ફટિકીય પદાર્થ મળી આવ્યો હતો. બેકપેક અસામાન્ય રીતે ભારે જણાતાં, અધિકારીઓએ તેના અંદરના લાઇનિંગની તપાસ કરી અને સમાન પદાર્થ ધરાવતું અન્ય એક છુપાવેલું પેકેટ શોધી કાઢ્યું. ફીલ્ડ ટેસ્ટિંગમાં એમ્ફેટામાઈન હોવાનું પોઝિટિવ પરિણામ મળ્યું હતું. કુલ મળીને 1.97 કિલોગ્રામ એમ્ફેટામાઈન રિકવર કરીને NDPS એક્ટ, 1985 હેઠળ જપ્ત કરવામાં આવ્યું હતું. મુસાફરની ધરપકડ કરવામાં આવી હતી.
15/16.10.26 ની રાત્રે હાથ ધરાયેલી એક અલગ કામગીરીમાં, ચોક્કસ બાતમીના આધારે કાર્યવાહી કરીને, ડીઆરઆઈના અધિકારીઓએ ઘાનાથી આઈજીઆઈ એરપોર્ટ, નવી દિલ્હીના ટર્મિનલ 3 પર આવી પહોંચેલા એક ભારતીય મુસાફરને અટકાવ્યો હતો. તેના સામાનની પદ્ધતિસરની તપાસ કરતા સફેદ પાવડર ધરાવતા 6 પારદર્શક પેકેટો મળી આવ્યા હતા, જેનું કુલ વજન 3.134 કિલોગ્રામ હતું. ફીલ્ડ ટેસ્ટિંગમાં કોકેઈન હોવાની પુષ્ટિ થઈ હતી. NDPS એક્ટ, 1985 ની જોગવાઈઓ હેઠળ આ પદાર્થ જપ્ત કરવામાં આવ્યો હતો અને મુસાફરની ધરપકડ કરવામાં આવી હતી.
આ કામગીરી નાર્કોટિક્સ સપ્લાય ચેઈનને તોડી પાડવા, છુપાવવાની નવીન પદ્ધતિઓ શોધી કાઢવા અને દેશના હવાઈ તથા રોડ નેટવર્ક દ્વારા ખતરનાક નાર્કોટિક ડ્રગ્સ અને સાયકોટ્રોપિક પદાર્થોની હેરફેરને રોકવા માટે ડીઆરઆઈના સતત પ્રયાસોને રેખાંકિત કરે છે.
