નવી દિલ્હી, 07 નવેમ્બર 2026: પેટ્રોલિયમ અને કુદરતી ગેસ મંત્રાલયે એ દાવાને ફગાવી દીધો છે કે પેટ્રોલમાં વધુ પડતા પ્રમાણમાં ઇથેનોલ ભેળવવામાં આવી રહ્યું છે. સરકારે સ્પષ્ટતા કરી છે કે સરકારી કંપનીઓ દ્વારા પૂરા પાડવામાં આવતા ‘E-20’ પેટ્રોલ નિર્ધારિત ગુણવત્તાના ધોરણોને અનુરૂપ છે. આ સ્પષ્ટતા કર્ણાટક સરકારની એક પ્રેસ રિલીઝ બાદ આવી છે, જેમાં દાવો કરવામાં આવ્યો હતો કે રાજ્યના કેટલાક રિટેલ આઉટલેટ્સ પર વેચાતા પેટ્રોલમાં 26 થી 31 ટકા જેટલું ઇથેનોલ રહેલું છે.
પેટ્રોલિયમ અને કુદરતી ગેસ મંત્રાલયે જણાવ્યું છે કે, સરકારી કંપનીઓ દ્વારા પૂરા પાડવામાં આવતા ‘E-20’ પેટ્રોલના જથ્થામાં ‘IS 17021’ ધોરણોનું પાલન કરવામાં આવ્યું છે. મંત્રાલયે વધુમાં જણાવ્યું હતું કે, કર્ણાટક સહિત 27 રાજ્યોમાંથી એકત્રિત કરવામાં આવેલા 893 નમૂનાઓ આ માપદંડોને અનુરૂપ હોવાનું જણાયું છે, જેમાં 19 થી 20 ટકા જેટલું ઇથેનોલ રહેલું છે.
આ અગાઉ, સરકારી માલિકીની ત્રણ તેલ કંપનીઓ ઇન્ડિયન ઓઇલ કોર્પોરેશન લિમિટેડ, ભારત પેટ્રોલિયમ કોર્પોરેશન લિમિટેડ અને હિન્દુસ્તાન પેટ્રોલિયમ કોર્પોરેશન લિમિટેડએ પણ સ્પષ્ટ કર્યું હતું કે તેમના દ્વારા પૂરો પાડવામાં આવતો E-20 પેટ્રોલ (ઇથેનોલ-મિશ્રિત મોટર ગેસોલિન) નિર્ધારિત ધોરણોને અનુરૂપ છે.
વધુ વાંચો: મહારાષ્ટ્રમાં ઝડપાયો ઝારખંડનો 13 લાખનો ઇનામી માઓવાદી સંજય યાદવ, 53 કેસમાં હતો વોન્ટેડ
