- દેશમાં ઓમિક્રોને લોકોની ચિંતા વધારી
- ભારતમાં રસીકરણ અભિયાન તેજ કરાયું
- વેક્સિન ડોઝની કુલ સંખ્યા 131 કરોડને પાર
દિલ્હી:કોરોના વાયરસના નવા અને ખતરનાક વેરિયન્ટ્ ગણાતા ઓમિક્રોન વેરિયન્ટની ભારતમાં એન્ટ્રી ઉપરાંત દેશમાં રસીકરણનું અભિયાન ચાલી રહ્યું છે અને કોવિડ-19 રસીના ડોઝની કુલ સંખ્યા 131 કરોડને વટાવી ગઈ છે.રસીકરણ અભિયાન અંતર્ગત ગુરુવારે 67 લાખથી વધુ ડોઝ આપવામાં આવ્યા હતા.
ગુરુવારે મોડી રાત્રે ભારત સરકાર દ્વારા જાહેર કરવામાં આવેલા આંકડા અનુસાર, ગુરુવારે સાંજે 7 વાગ્યે દેશમાં કોવિડ -19 રસીના કુલ ડોઝની સંખ્યા 131 કરોડને વટાવી ગઈ છે. ગુરુવાર સુધીમાં દેશભરમાં કુલ 131,09,90,768 ડોઝ આપવામાં આવ્યા હતા.ગુરુવાર સુધીમાં, 67 લાખથી વધુ એટલે કે 67,11,113 ડોઝ આપવામાં આવ્યા હતા.
આ પહેલા કેન્દ્રીય સ્વાસ્થ્ય મંત્રાલયે બુધવારે જણાવ્યું હતું કે,દેશમાં કોવિડ-19 રસીના કુલ ડોઝની સંખ્યા 130 કરોડને વટાવી ગઈ છે. બુધવારે સાંજે 7 વાગ્યા સુધી 72 લાખથી વધુ રસીના ડોઝ આપવામાં આવ્યા હતા. ભારતમાં રસીકરણ અભિયાન આ વર્ષની શરૂઆતમાં 16 જાન્યુઆરીએ શરૂ કરવામાં આવ્યું હતું, જેમાં પ્રથમ તબક્કામાં આરોગ્ય કર્મચારીઓને રસી આપવામાં આવી હતી. આ પછી, આગામી મહિને 2 ફેબ્રુઆરીથી ફ્રન્ટલાઈન વર્કરોનું રસીકરણ અભિયાન શરૂ કરવામાં આવ્યું હતું.
પ્રારંભિક તબક્કામાં આરોગ્ય કર્મચારીઓના રસીકરણ પછી, કોવિડ -19 રસીકરણનો આગળનો તબક્કો 1 માર્ચથી 60 વર્ષથી વધુ વયના લોકો અને 45 વર્ષથી વધુ વયના બીમાર લોકો માટે શરૂ કરવામાં આવ્યો હતો. ત્યારબાદ 1 એપ્રિલથી દેશમાં 45 વર્ષથી વધુ ઉંમરના તમામ લોકો માટે રસીકરણ શરૂ કરવામાં આવ્યું હતું. આ પછી, કેન્દ્ર સરકારે એક પગલું આગળ વધાર્યું અને 1 મેથી 18 વર્ષથી વધુ વયના તમામ પુખ્ત વયના લોકોને રસીકરણની મંજૂરી આપી.
