નવી દિલ્હી, 9 ઓક્ટોબર 2026: એલોન મસ્કની કંપની ‘સ્ટારલિંક’ ના લાઇસન્સને લઈને ઊભા થયેલા વિવાદ વચ્ચે કેન્દ્રીય સંચાર મંત્રી જ્યોતિરાદિત્ય સિંધિયાએ ભારત સરકારનું વલણ સ્પષ્ટ કર્યું છે. તેમણે મસ્કના આક્ષેપોને સખત શબ્દોમાં ફગાવતા જણાવ્યું હતું કે, ભારત કોઈપણ ક્ષેત્રમાં કોઈ એક કંપનીનો એકાધિકાર સ્વીકારશે નહીં. દેશમાં સેટેલાઇટ સંચાર સેવાઓ માટે તમામ યોગ્ય કંપનીઓને સમાન તક આપવામાં આવી રહી છે.
કેન્દ્રીય મંત્રીએ માહિતી આપતાં જણાવ્યું કે, હાલમાં ભારતમાં સેટેલાઇટ સંચાર સેવાઓ પૂરી પાડવા માટે ત્રણ અગ્રણી કંપનીઓને લાઇસન્સ આપવામાં આવ્યા છે. જેમાં રિલાયન્સ જિઓ, વનવેબ અને એલોન મસ્કની સ્ટારલિંક સામેલ છે. આ ઉપરાંત, વૈશ્વિક દિગ્ગજ કંપની એમેઝોન પણ ભારતમાં પોતાની સેટેલાઇટ સેવાઓ શરૂ કરવા માટે જરૂરી લાઇસન્સ મેળવવાની પ્રક્રિયા પૂર્ણ કરી રહી છે.
સિંધિયાએ સ્પષ્ટતા કરી હતી કે, એલોન મસ્કની કંપની સ્ટારલિંકને પણ લાઇસન્સ મંજૂર કરી દેવામાં આવ્યું છે, પરંતુ વ્યવસાયિક સેવાઓ શરૂ કરતા પહેલાં તમામ કંપનીઓ માટે નિયમ મુજબ સુરક્ષા સંબંધિત તપાસ અને શરતો પૂર્ણ કરવી ફરજિયાત છે. તેમણે ઉમેર્યું કે સેટેલાઇટ સેવાઓ માટે સ્પેક્ટ્રમની હરાજી કરવાને બદલે વહીવટી રીતે ફાળવણી કરવાનો નિર્ણય લેવાયો છે અને હાલ કિંમતો નક્કી કરવા અંગે TRAI અને દૂરસંચાર વિભાગ વચ્ચે કામગીરી ચાલી રહી છે.
આ અગાઉ એલોન મસ્કે ગંભીર આરોપ લગાવ્યો હતો કે ભારતમાં પ્રભાવશાળી વ્યાપારી હિત ધરાવતા જૂથોના કારણે તેમની કંપની સ્ટારલિંકને સેવાઓ શરૂ કરવા માટે જરૂરી મંજૂરીઓ આપવામાં વિલંબ કરવામાં આવી રહ્યો છે. મસ્કના આ દાવા સામે સંચાર મંત્રાલયે સ્પષ્ટતા કરી છે કે તમામ ત્રણ કંપનીઓ હાલ નિયમનકારી પ્રક્રિયાના એક સરખા તબક્કામાં છે અને ગૃહ મંત્રાલય દ્વારા તેમની સિક્યોરિટી ક્લિયરન્સની તપાસ ચાલી રહી છે.
કેન્દ્રીય સંચાર રાજ્ય મંત્રી ડૉ. ચંદ્રેશેખર પેમ્માસાનીએ પણ આ મુદ્દે સ્પષ્ટતા કરતા જણાવ્યું હતું કે, ટેલિકોમ વિભાગે તમામ સેટકોમ કંપનીઓને ટ્રાયલ માટે અસ્થાયી સ્પેક્ટ્રમ અને લાઇસન્સ ફાળવી દીધા છે. હવે માત્ર ગૃહ મંત્રાલય તરફથી અંતિમ સુરક્ષા મંજૂરીની રાહ જોવાઈ રહી છે, તેથી આ બાબત કોઈ એક ચોક્કસ કંપની સાથે જોડાયેલી નથી.
