બેઇજિંગ, 07 જુલાઈ 2026: Storms in China’s Hubei province ચીન હાલમાં કુદરતના પ્રકોપનો સામનો કરી રહ્યું છે. ચીનના મધ્ય પ્રાંત હુબેઈમાં ભયંકર વાવાઝોડાએ ભારે તબાહી મચાવી છે. સરકારી મીડિયાના અહેવાલ મુજબ, આ દુર્ઘટનામાં ઓછામાં ઓછા આઠ લોકોનાં મોત થયાં છે. હવામાન વિભાગે દેશના વિવિધ ભાગોમાં મુશળધાર વરસાદની ચેતવણી આપી છે.
પવન 149 કિમી/કલાકની ઝડપે ફૂંકાયો
સોમવારે સાંજે, માત્ર ચાર કલાકના ગાળામાં હુબેઈ પ્રાંતના હુઆંગશી, હુઆંગગાંગ, એઝોઉ અને ઝિયાનનિંગ શહેરોમાં કલાકના 149 કિલોમીટરની ઝડપ ધરાવતા વિનાશક પવનો ફૂંકાયા હતા. આ વાવાઝોડાને કારણે અનેક વિસ્તારોમાં વ્યાપક નુકસાન થયું હતું.
ચીનના રાષ્ટ્રીય હવામાન કેન્દ્રના જણાવ્યા અનુસાર, આગામી 24 કલાક દરમિયાન દેશના કેટલાક ભાગોમાં પરિસ્થિતિ વધુ ગંભીર બની શકે છે. ગુઆંગસીના દક્ષિણ-પૂર્વીય વિસ્તાર તેમજ જિયાંગસુ અને શેનડોંગ જેવા પૂર્વીય પ્રાંતોમાં 260 મિમી સુધીનો અત્યંત ભારે વરસાદ પડી શકે છે, જેનાથી ભૂસ્ખલનનું જોખમ વધી શકે છે. આ ઉપરાંત, હવામાન વિભાગે ચીનના અમુક ઉત્તર-પૂર્વીય અને દક્ષિણી ભાગોમાં જોખમી ટોર્નેડો આવવાની શક્યતા અંગે પણ ચેતવણી આપી છે.
પાકને ભારે નુકસાન થવાની આશંકા
હુબેઈ અને શેનડોંગ ચીનના મુખ્ય કૃષિપ્રધાન પ્રાંતો છે. આ બેમોસમી અને ભારે વરસાદને કારણે ખેતરોમાં ઊભા મકાઈ, મગફળી અને શાકભાજીના પાકને થયેલા વ્યાપક નુકસાન અંગે ચિંતા વધી છે.
વધુ વાંચો: પાકિસ્તાન: બલૂચિસ્તાનમાં પોલીસ ચોકી પર હુમલો, SHO સહિત નવ પોલીસકર્મીઓનાં મોત
