પેલેસ્ટાઈનના રાષ્ટ્રપતિ મહમૂદ અબ્બાસ પર જાનલેવા હુમલો
દિલ્હી: પેલેસ્ટાઈનના રાષ્ટ્રપતિ મહમૂદ અબ્બાસ પર બુધવારે જાનલેવા હુમલો થયો હતો. અહેવાલો અનુસાર, આતંકવાદીઓએ પેલેસ્ટાઈનના રાષ્ટ્રપતિ મહમૂદ અબ્બાસને તેમના કાફલાની કાર પર ફાયરિંગ કરીને મારવાનો પ્રયાસ કર્યો છે.
અહેવાલો અનુસાર, અબ્બાસને ‘સન ઓફ અબુ જંદાલ’ એ ઈઝરાયેલ વિરુદ્ધ યુદ્ધની ઘોષણા કરવા માટે 24 કલાકનું અલ્ટીમેટમ આપ્યું હતું. આ આતંકવાદી સંગઠને અબ્બાસને ધમકી પણ આપી હતી કે જો તે આમ નહીં કરે તો તેના ગંભીર પરિણામો ભોગવવા પડશે. ગઈકાલે આ સમયમર્યાદા પૂરી થયા પછી, અબ્બાસના કાફલા પર હુમલો કરવામાં આવ્યો હતો જેમાં પેલેસ્ટાઈનના રાષ્ટ્રપતિ માંડ માંડ બચ્યા હતા. પેલેસ્ટાઈનના રાષ્ટ્રપતિ પર હુમલાની જવાબદારી ‘સન ઓફ અબુ જંદાલ’એ લીધી છે.
આતંકવાદી જૂથના હુમલાખોરો દ્વારા રાષ્ટ્રપતિના કાફલા પર થયેલા હુમલાનો વીડિયો પણ સામે આવ્યો છે. વીડિયોમાં સ્પષ્ટપણે જોઈ શકાય છે કે કેવી રીતે ‘સન ઓફ અબુ જંદાલ’ના આતંકવાદીઓ રાષ્ટ્રપતિ અબ્બાસના કાફલા પર ફાયરિંગ કરી રહ્યા છે. અહેવાલો અનુસાર, કેટલાક બંદૂકધારી એક ઘરની સામે પાર્ક કરેલા વાહનની આસપાસ હાજર હતા. હુમલાખોરો દ્વારા ચલાવવામાં આવેલી ગોળી ખુલ્લામાં હાજર અબ્બાસના એક અંગરક્ષકને વાગી હતી, જેના પછી તે જમીન પર પડી ગયો હતો.