હાઈકોર્ટની સખત નારાજગી બાદ વંદા પાર્ટીના રાંકા અને દાસે અરજી પરત ખેંચી

નવી દિલ્હી, 21 ઑક્ટોબર, 2026 – High Court’s strong displeasure – કોકરોચ જનતા પાર્ટી (CJP)ના નેતાઓ આશુતોષ રાંકા અને સૌરવ દાસની અટકાયત સામે દાખલ કરવામાં આવેલી અરજી પર આજે દિલ્હી હાઈકોર્ટમાં સુનાવણી હાથ ધરવામાં આવી હતી. સુનાવણી દરમિયાન હાઈકોર્ટે બંને નેતાઓની કડક શબ્દોમાં ઝાટકણી કાઢતાં તેમના વર્તન અંગે ગંભીર ટિપ્પણીઓ કરી હતી, જેના પગલે બંને નેતાઓએ પોતાની અરજી પાછી ખેંચી લીધી હતી.

હવે બપોરે SEM અદાલતમાં બંનેની અરજી પર સુનાવણી થશે. વાસ્તવમાં જંતર-મંતર પર વિરોધ પ્રદર્શન કરવાના પ્રયાસમાં જામીન બોન્ડનું ઉલ્લંઘન કરવાના આક્ષેપસર બંનેની ધરપકડ કરવામાં આવી હતી. કોર્ટે જણાવ્યું કે, “તમે બોન્ડનું ઉલ્લંઘન કર્યું છે. તમે બંને કંઈ ‘જનરેશન ઝેડ’ (GEN Z) નથી. પ્રતિબંધ હોવા છતાં તમે જંતર-મંતર કેમ ગયા હતા? આખરે તમારા સંગઠનનો હેતુ શું છે?”

આ પણ વાંચોઃ યુનિયન પબ્લિક સર્વિસ કમિશને સપ્ટેમ્બર, 2026ના મહિના માટે ભરતીનાં પરિણામો જાહેર કર્યા

કોર્ટે તેમની પ્રવૃત્તિઓ સામે સવાલો ઉઠાવતા અન્ય દેશોમાં થયેલા વિરોધ પ્રદર્શનો અને હિંસાનો પણ ઉલ્લેખ કર્યો હતો, જ્યાં વિદ્યાર્થી પ્રદર્શનો દરમિયાન હિંસક બન્યા હતા. કોર્ટે ઉમેર્યું, “તમે વિરોધ પ્રદર્શનની આગેવાની કરી રહ્યા છો, જ્યારે તમે બેરિકેડ તોડશો ત્યારે એવી શક્યતા છે કે અન્ય લોકો પણ તમારું અનુસરણ કરશે. હોઈ શકે કે તે સમયે કેટલાક લોકો તમારા નિયંત્રણમાં પણ ન રહે.”

જસ્ટિસ સુબ્રમણ્યમ પ્રસાદે ત્યારબાદ અન્ય દેશોમાં થયેલી હિંસા અને આગચંપીનો ઉલ્લેખ કર્યો હતો. તેમણે કહ્યું, “અમે જોયું છે કે આપણા દેશની બહાર આવું બની ચૂક્યું છે. વિદ્યાર્થીઓના વિરોધ પ્રદર્શનથી શરૂ થયેલી બાબત આગચંપી અને ઈમારતોને સળગાવવામાં પરિણમી હતી.” કોર્ટે CJPના નેતાઓને સવાલ કર્યો કે પ્રથમ ધરપકડ બાદ જ્યારે બોન્ડ પર હસ્તાક્ષર કર્યા હતા તો તેનું ઉલ્લંઘન કેમ કર્યું?

સૌરવ દાસ, આશુતોષ રાંકા અને અભિજીત દીપકેની 10 ઓક્ટોબરે દિલ્હી એરપોર્ટ પરથી ત્યારે ધરપકડ કરવામાં આવી હતી જ્યારે તેઓ જંતર-મંતર પર વિરોધ પ્રદર્શનનું નેતૃત્વ કરવા આવી રહ્યા હતા. ત્યારબાદ તે જ દિવસે રૂ. 50,000નો બોન્ડ જમા કરાવ્યા બાદ તેમને છોડી દેવામાં આવ્યા હતા. જોકે સૌરવ દાસ અને આશુતોષ રાંકાની જંતર-મંતર પર પ્રદર્શન કરવાના પ્રયાસમાં 14 ઓક્ટોબરે ફરીથી ધરપકડ કરવામાં આવી હતી અને તેમને 5 દિવસની ન્યાયિક કસ્ટડીમાં મોકલવામાં આવ્યા હતા.

તેમની ન્યાયિક કસ્ટડી લંબાવતા સ્પેશિયલ એક્ઝિક્યુટિવ મેજિસ્ટ્રેટ (SEM) એ 19 ઓક્ટોબરના પોતાના આદેશમાં જણાવ્યું હતું કે આરોપીઓએ જાણીજોઈને પોતાના બોન્ડનું ઉલ્લંઘન કર્યું છે અને શાંતિ ભંગ કરી છે. ત્યારબાદ તેમણે મેજિસ્ટ્રેટના આદેશ સામે દિલ્હી હાઈકોર્ટમાં અપીલ કરી હતી, જેના પર આજે સુનાવણી થઈ હતી.

આ પણ વાંચોઃ ભારત સરકાર જ્ઞાન અને સામર્થ્યનો સમન્વય ધરાવતો દેશ બનાવવા માટે કાર્યરત: સંરક્ષણ મંત્રી