નવી દિલ્હીઃ સુદાનના આરોગ્ય મંત્રાલયે જણાવ્યું કે, દેશના ઘણા ભાગોમાં મુશળધાર વરસાદ અને પૂરને કારણે ઓછામાં ઓછા 32 લોકો માર્યા ગયા અને 107 અન્ય ઘાયલ થયા. અલ-ફાદિલ મોહમ્મદ મહમૂદે એક નિવેદનમાં જણાવ્યું હતું કે, “વરસાદ અને પૂરને કારણે સાત રાજ્યોને અસર થઈ છે અને 5,575 મકાનોને નુકસાન થયું છે.”
સિન્હુઆ ન્યૂઝ એજન્સીના જણાવ્યા અનુસાર, તેમણે કહ્યું કે ભારે વરસાદ અને પૂરને કારણે ડાયરિયાના ઘણા કેસ નોંધાયા છે, જેમાંથી કસાલામાં 102, ખાર્તુમમાં ચાર અને ગેઝિરા રાજ્યમાં 16 કેસ નોંધાયા છે. તેમણે કહ્યું કે અન્ય રાજ્યોમાં સ્વાસ્થ્યની સ્થિતિ સ્થિર છે. મંત્રાલય વરસાદની મોસમ દરમિયાન બનતા રોગચાળાને પહોંચી વળવા જરૂરી પગલાં અપનાવવા અંગે ચિંતિત છે.
અગાઉના અહેવાલમાં, સુદાનની હવામાન સત્તાધિકારીએ કસાલા શહેરમાંથી વહેતી ગાશ નદીના જળસ્તરમાં વધારો થવાની આશંકા વ્યક્ત કરી હતી. નાગરિકોને સતર્ક રહેવા અને નદી કિનારાથી દૂર રહેવા તાકીદ કરવામાં આવી છે. સુદાનમાં પૂર એ વાર્ષિક ઘટના છે, જે સામાન્ય રીતે જૂન અને ઓક્ટોબર વચ્ચે થાય છે.
છેલ્લા ત્રણ વર્ષમાં ભારે વરસાદને કારણે સેંકડો લોકોના મોત થયા છે અને ખેતીની જમીનનો મોટો હિસ્સો નાશ પામ્યો છે. આ વર્ષની વરસાદી ઋતુએ સુદાનીસ આર્મ્ડ ફોર્સીસ (SAF) અને અર્ધલશ્કરી રેપિડ સપોર્ટ ફોર્સીસ (RSF) વચ્ચે ચાલી રહેલા સંઘર્ષથી પ્રભાવિત લોકોની મુશ્કેલીઓ વધારી દીધી છે. સુદાનમાં SAF અને RSF વચ્ચે 15 એપ્રિલ 2023થી ઘાતક સંઘર્ષ ચાલી રહ્યો છે, જેના કારણે ઓછામાં ઓછા 16,650 લોકોએ જીવ ગુમાવ્યા છે.
