ઇસ્લામાબાદ, 13 ઓક્ટોબર 2026: પાકિસ્તાનના પંજાબ પ્રાંતમાં એક પેસેન્જર ટ્રેન પાટા પરથી ઉતરી ગઈ હતી. આ અકસ્માતમાં પાંચ લોકોનાં મોત થયાં અને અન્ય ઘણા લોકો ઘાયલ થયા. પાકિસ્તાનની ‘જિયો ન્યૂઝ’ ચેનલે આ ઘટના અંગે અહેવાલ આપ્યો હતો.
ઘાયલોને સારવાર માટે હોસ્પિટલ મોકલવામાં આવ્યા
પાકિસ્તાન રેલ્વેના પ્રવક્તા કલીમ અખ્તરને ટાંકીને સમાચાર એજન્સી એપી (AP) એ અહેવાલ આપ્યો છે કે દક્ષિણના બંદર શહેર કરાચીથી વાયવ્ય દિશામાં આવેલા શહેર પેશાવર જઈ રહેલી ‘રહેમાન બાબા એક્સપ્રેસ’ પંજાબ પ્રાંતના શેર શાહ ખાતે પાટા પરથી ઉતરી ગઈ હતી. અકસ્માતમાં ઘાયલ થયેલા લોકોને સારવાર માટે મુલતાનના નિશ્તર હોસ્પિટલમાં લઈ જવામાં આવ્યા છે, જ્યારે બચાવ ટીમો અકસ્માત સ્થળે કામ કરી રહી છે. ‘જીઓ ન્યૂઝ’ના જણાવ્યા અનુસાર, આ અકસ્માત સવારે લગભગ 5:15 વાગ્યે થયો હતો.
રાષ્ટ્રપતિ અને વડાપ્રધાને શોક વ્યક્ત કર્યો
પાકિસ્તાનના રાષ્ટ્રપતિ આસિફ અલી ઝરદારી અને વડાપ્રધાન શાહબાઝ શરીફે અલગ-અલગ નિવેદનોમાં મૃત્યુ અંગે શોક વ્યક્ત કર્યો હતો અને અધિકારીઓને ઘાયલોને શક્ય તમામ મદદ પૂરી પાડવા સૂચના આપી હતી.
જૂના પાટા અને જૂની થઈ ગયેલી સિગ્નલિંગ સિસ્ટમ્સને લગતી સમસ્યાઓનો સામનો કરી રહ્યો છે દેશ
પાકિસ્તાનમાં ટ્રેન અકસ્માતો સામાન્ય છે, જ્યાં રેલવે વ્યવસ્થા દાયકાઓથી અપૂરતું રોકાણ, જૂના થઈ ગયેલા પાટા અને જૂની સિગ્નલિંગ સિસ્ટમ જેવી સમસ્યાઓનો સામનો કરી રહી છે. વર્ષ 2023માં દક્ષિણ પાકિસ્તાનમાં એક પેસેન્જર ટ્રેનના દસ ડબ્બા પાટા પરથી ઉતરી ગયા હતા, જેના પરિણામે 30 લોકોનાં મોત થયાં હતાં અને 90થી વધુ લોકો ઘાયલ થયા હતા.
વધુ વાંચો: હરિયાણામાં 700 કરોડનું કૌભાંડ! CBIએ વધુ 4 આરોપીઓની ધરપકડ કરી
