ICC ચેમ્પિયન્સ ટ્રોફીના આયોજન અંગે આઈસલેન્ડએ ઈચ્છા વ્યક્ત કરી, પાકિસ્તાન ઉપર કર્યા કટાક્ષ
નવી દિલ્હીઃ વર્ષ 2025માં આઈસીસી ચેમ્પિયનન્સ ટ્રોફી યોજાશે અને આ ટૂર્નામેન્ટની યજમાની પાકિસ્તાન કરે તેવી શકયતા છે. બીજી તરફ પાકિસ્તાન દ્વારા અત્યારથી જ આઈસીસી ઉપર ભારત મામલે દબાણ લાવવામાં આવી રહ્યું છે. દરમિયાન આ ટૂર્નામેન્ટ અન્ય સ્થળે રમાય તેવી શકયતાઓ વ્યક્ત થઈ રહી છે. ત્યારે હવે આઈસલેન્ડ દ્વારા ચેમ્પિયન્સ ટ્રોફીની યજમાની કરવાની ઈચ્છા વ્યક્ત કરીને પાકિસ્તાનની મજાક ઉડાવી છે. આઈસલેન્ડ ક્રિકેટે સોશિયલ મીડિયા પર આઈસીસી અધ્યક્ષ ગ્રેગ બાર્કલેને પત્ર લખીને ચેમ્પિયન્સ ટ્રોફીની યજમાનીનો દાવો વ્યક્ત કર્યો છે.
ચેમ્પિયન્સ ટ્રોફી 2025નું આયોજન પાકિસ્તાનમાં થવાનું છે. જો કે ગયા સપ્તાહથી એવી ચર્ચા ચાલી રહી છે કે ચેમ્પિયન્સ ટ્રોફીની યજમાની પાકિસ્તાન પાસેથી છીનવાઈ શકે છે. આઇસલેન્ડ ક્રિકેટે સોશિયલ મીડિયા પર ફરતી આવી જ અફવાઓના આધારે હોસ્ટિંગ માટે પોતાનો દાવો કર્યો છે. આઇસલેન્ડે આ દાવામાં એટલું બધું લખ્યું છે કે હવે સોશિયલ મીડિયા પર તેની ખૂબ ચર્ચા થઈ રહી છે.
ચેમ્પિયન્સ ટ્રોફીની યજમાનીની ઇચ્છા વ્યક્ત કરતી વખતે, આઇસલેન્ડ ક્રિકેટે પાકિસ્તાનમાં સંભવિત સમસ્યાઓનો ઉલ્લેખ કર્યો છે. પાકિસ્તાન પર કટાક્ષ કરતા તેણે તો ત્યાં સુધી કહ્યું કે આઇસલેન્ડની ડ્રેનેજ સિસ્ટમ ત્યાં કરતાં સારી છે અને અહીં હંમેશા વીજળી રહે છે. આઇસલેન્ડ ક્રિકેટે સોશિયલ મીડિયા પર એક પોસ્ટમાં લખ્યું, ‘અમે પીછેહઠ કરનારા લોકો નથી. આજે અમે ચેમ્પિયન્સ ટ્રોફી 2025 માટે અમારો દાવો વ્યક્ત કર્યો છે. ગ્રેગ બાર્કલી આના પર શું કહે છે તે જોવા માટે અમે ઉત્સુક છીએ. આ શબ્દો સાથે, આઇસલેન્ડ ક્રિકેટે ICC અધ્યક્ષને સંબોધીને એક લાંબો પત્ર પોસ્ટ કર્યો છે.
આ પત્રમાં લખવામાં આવ્યું છે કે, ‘આઇસલેન્ડ ક્રિકેટ એસોસિએશન પાકિસ્તાનમાં યોજાનારી ચેમ્પિયન્સ ટ્રોફી 2025ની યજમાની કરવાની ઇચ્છા વ્યક્ત કરે છે. અમે આ ઈચ્છા અફવાઓના આધારે વ્યક્ત કરી રહ્યા છીએ કે બોર્ડની સુરક્ષા અને રાજકીય ચિંતાઓને કારણે આ ટૂર્નામેન્ટ પાકિસ્તાનમાં નહીં યોજાય. અમે સાંભળ્યું છે કે, આ ટુર્નામેન્ટ માટે હાઇબ્રિડ મોડલ લાવવામાં આવી શકે છે. જો કે, અત્યાર સુધી આ બાબત વિશે કોઈને વધુ ખબર નથી, તેથી અમે આ ટુર્નામેન્ટનું આયોજન કરવા ઈચ્છીએ છીએ.
આઈસલેન્ડ ક્રિકેટે લખ્યું છે કે, ‘અમારો ઈરાદો મજબૂત ટૂર્નામેન્ટનું આયોજન કરવાનો છે. અમારી પાસે ક્રિકેટ ચાહકોની સંખ્યા પણ સારી છે અને સારા મેદાન પણ ઉપલબ્ધ છે. આઇસલેન્ડમાં ફેબ્રુઆરી-માર્ચમાં હવામાન સારું રહે છે. અમારી પાસે પુષ્કળ વીજળી ઉપલબ્ધ છે. અમારી પાસે ઘણા બધા પેનલ હીટર પણ છે જે ખેલાડીઓને ગરમ રાખશે.
