આઈપીએલમાં નોટબુક સેલિબ્રેશનને કારણે વિવાદોમાં રહેલો લખનૌનો સ્પિનર દિગ્વેશ રાઠી ફરી એકવાર ચર્ચામાં આવ્યો છે. આ વખતે તે સનરાઇઝર્સ હૈદરાબાદના ઓપનર અભિષેક શર્મા સાથે દલીલમાં ઉતર્યો હતો. આ કારણે, આ સિઝનમાં પહેલીવાર તેને દંડ ઉપરાંત મોટી સજા મળી છે. પોતાની પહેલી જ IPLમાં વિવાદોમાં ઘેરાયેલા આ સ્પિનર પર એક મેચનો પ્રતિબંધ મૂકવામાં આવ્યો છે. આ ઉપરાંત તેના પર દંડ પણ ફટકારવામાં આવ્યો છે. રાઠી આ સીઝનમાં દંડ તરીકે લગભગ 9.37 લાખ રૂપિયા ચૂકવી ચૂક્યો છે, જોકે તેને આ લીગમાં વધારે પૈસા મળી રહ્યા નથી.
લખનૌ સુપર જાયન્ટ્સના સ્પિનર દિગ્વેશ રાઠીએ પોતાની પહેલી જ IPLમાં બધાને પ્રભાવિત કર્યા છે. તેણે 12 મેચોમાં 8.18 ની ઇકોનોમી સાથે 14 વિકેટ લીધી છે. જ્યારે તેને LSG એ માત્ર 30 લાખ રૂપિયામાં ખરીદ્યો હતો. આ સિઝનમાં ફક્ત 30 લાખ રૂપિયા કમાતા આ બોલરને ત્રણ વાર દંડ ફટકારવામાં આવ્યો છે. આ કારણે તેમને 9.37 લાખ રૂપિયાનો દંડ ભરવો પડ્યો. આ હોવા છતાં, તે પોતાની નોટબુક ઉજવણી કરવાનું ટાળી રહ્યો નથી.
દિગ્વેશ રાઠીને પહેલી વાર 1 એપ્રિલે પંજાબ કિંગ્સ સામેની મેચ દરમિયાન દંડ ફટકારવામાં આવ્યો હતો. તે મેચમાં પ્રિયાંશ આર્યને આઉટ કર્યા પછી રાઠીએ નોટબુક સેલિબ્રેશન કર્યું હતું. જે બાદ વિવાદ થયો અને તેમને 1.87 લાખ રૂપિયાનો દંડ ફટકારવામાં આવ્યો હતો. ત્રણ દિવસ પછી, 4 એપ્રિલના રોજ, તેણે ફરીથી મુંબઈ ઈન્ડિયન્સ સામે નોટબુક સેલિબ્રેશન કર્યું હતું. આ પછી, તેમના પર 3.75 લાખ રૂપિયાનો દંડ ફટકારવામાં આવ્યો. વારંવાર દંડ ફટકારવામાં આવ્યો હોવા છતાં, તે પોતાની હરકતો બંધ ન કરતો અને 19 મેના રોજ, તે સનરાઇઝર્સ હૈદરાબાદના ઓપનર અભિષેક શર્મા સાથે ઝઘડો કરવા લાગ્યો હતો. જેના કારણે તેને 3.75 લાખ રૂપિયાનો દંડ ફટકારવામાં આવ્યો હતો અને એક મેચ માટે પ્રતિબંધ પણ લગાવવામાં આવ્યો હતો. હવે તે ગુજરાત ટાઇટન્સ સામેની આગામી મેચ રમી શકશે નહીં.
જ્યારે દિગ્વેશ રાઠી કોઈ બેટ્સમેનને આઉટ કરે છે, ત્યારે તે બીજી બાજુ પોતાના હાથથી કંઈક કાલ્પનિક રીતે લખે છે. ઉજવણી કરવાની આ તેની અનોખી રીત છે, પરંતુ બેટ્સમેનોને આ રીત પસંદ નથી આવી રહી, જેના કારણે મેચ દરમિયાન વિવાદ ઉભો થઈ રહ્યો છે.
