ઈરાનના સુપ્રીમ લીડર આયાતુલ્લાહ ખામેનીએ મંગળવારે રાત્રે X પર લખ્યું – યુદ્ધ શરૂ થાય છે. અમે આતંકવાદી યહૂદી શાસનને કડક જવાબ આપીશું. અમે તેમના પર કોઈ દયા નહીં બતાવીએ. આ જાહેરાત પછી, ઈરાને ઈઝરાયલ પર 25 મિસાઈલ છોડી છે.
ઈરાન અને ઈઝરાયલ વચ્ચે છેલ્લા 5 દિવસથી હિંસક સંઘર્ષ ચાલી રહ્યો છે, હવે ખામેનીની પોસ્ટને યુદ્ધની સત્તાવાર ઘોષણા માનવામાં આવી રહી છે. એટલે કે હવે તેને સંઘર્ષને બદલે યુદ્ધ કહેવામાં આવશે. ઘણા મીડિયા રિપોર્ટ્સ અનુસાર, અમેરિકા પણ ટૂંક સમયમાં તેમાં સામેલ થઈ શકે છે.
કેનેડાથી પરત ફર્યા બાદ રાષ્ટ્રપતિ ડોનાલ્ડ ટ્રમ્પે વ્હાઇટ હાઉસ ખાતે રાષ્ટ્રીય સુરક્ષા ટીમ સાથે બેઠક યોજી હતી. આ પછી, અમેરિકાએ મધ્ય પૂર્વમાં વધુ ફાઇટર જેટ મોકલવાનો નિર્ણય લીધો.
વોશિંગ્ટન સ્થિત એક માનવાધિકાર જૂથે દાવો કર્યો છે કે ઈરાનમાં મૃત્યુઆંક હવે 585 પર પહોંચી ગયો છે. જ્યારે 1,326 લોકો ઘાયલ થયા છે.
ઈરાની સરકારે હજુ સુધી મૃત્યુઆંકની સંપૂર્ણ વિગતો શેર કરી નથી. ઈરાને છેલ્લે સોમવારે જાનહાનિની માહિતી શેર કરી હતી. સરકારના જણાવ્યા અનુસાર, આ લડાઈમાં 224 ઈરાનીઓ માર્યા ગયા છે, જ્યારે 1,277 ઘાયલ થયા છે.