દૂતાવાસ નજીક વિસ્ફોટ બાદ ઈઝરાયેલે એડવાઈઝરી જારી કરી,યહૂદી-ઈઝરાયલી નાગરિકોને આપી ચેતવણી
દિલ્હી:નવી દિલ્હીમાં ઈઝરાયેલની એમ્બેસી પાસે થયેલા વિસ્ફોટ બાદ ઈઝરાયેલની રાષ્ટ્રીય સુરક્ષા પરિષદે ભારતમાં પોતાના નાગરિકોને ચેતવણી જાહેર કરી છે. ઈઝરાયેલે આ હુમલાને સંભવિત આતંકવાદી હુમલો ગણાવ્યો છે. ઈઝરાયેલે યહૂદીઓ અને ઈઝરાયેલના નાગરિકો માટે એડવાઈઝરી જારી કરી છે અને સંભવિત ખતરાથી બચવા ચેતવણી આપી છે. ઈઝરાયેલની એમ્બેસી નવી દિલ્હીના ચાણક્યપુરી ડિપ્લોમેટિક એન્ક્લેવમાં સ્થિત છે.
ઇઝરાયેલ દૂતાવાસના પ્રવક્તા ગાય નીરનું કહેવું છે કે દૂતાવાસની નજીક સાંજે લગભગ 5:48 વાગ્યે વિસ્ફોટ થયો હતો. દિલ્હી પોલીસ અને સુરક્ષા ટીમ આ મામલે તપાસ કરી રહી છે. હુમલામાં કોઈને ઈજા થઈ નથી. ઈઝરાયેલે ઈઝરાયેલના નાગરિકોને ચેતવણી જાહેર કરી છે. યહૂદી નાગરિકોને મોલ અને બજારો જેવા ભીડવાળા સ્થળોએ ન જવાની સલાહ આપવામાં આવી છે.લોકોને રેસ્ટોરાં, હોટલ, પબ અને અન્ય સ્થળો સહિત જાહેર સ્થળોએ સાવચેત રહેવા ચેતવણી આપવામાં આવી છે. યહૂદીઓને જૂથોમાં એકસાથે ક્યાંય જવાનું ટાળવા માટે કહેવામાં આવ્યું છે. એડવાઈઝરીમાં કહેવામાં આવ્યું છે કે જો કોઈ ક્યાંય જાય તો તમારી ઓળખ સામાન્ય લોકો સાથે શેર ન કરો અને સોશિયલ મીડિયા પર તસવીરો પોસ્ટ કરવાનું ટાળો.
દિલ્હી પોલીસના એક વરિષ્ઠ અધિકારીનું કહેવું છે કે દિલ્હી પોલીસને સૌથી પહેલા મંગળવારે સાંજે લગભગ 5.45 વાગ્યે દૂતાવાસની પાછળ વિસ્ફોટની માહિતી મળી હતી. આ માહિતી ઈઝરાયેલ એમ્બેસીના સુરક્ષા ગાર્ડે આપી હતી.તેણે 100 મીટર દૂર વિસ્ફોટનો અવાજ સાંભળ્યો. માહિતી બાદ દિલ્હી પોલીસ, ડિસ્ટ્રિક્ટ સ્ટાફ, સ્પેશિયલ સેલ, દિલ્હી ફાયર સર્વિસ અને કેન્દ્રીય સુરક્ષા એજન્સીઓના અધિકારીઓ અને કર્મચારીઓ ઘટનાસ્થળે પહોંચી ગયા હતા. પોલીસ અધિકારીઓનું કહેવું છે કે સ્થળ અથવા નજીકથી આગ કે વિસ્ફોટના કોઈ સંકેત નથી. બોમ્બ ડિટેક્શન ડોગ સ્ક્વોડ અને બોમ્બ ડિસ્પોઝલ સ્ક્વોડ પણ ઘટનાસ્થળે તૈનાત કરવામાં આવી હતી.
