ચમકદાર ત્વચા, મજબૂત વાળ અને નખ માટે આહારમાં કરો આ ફેરફાર

આજના ભાગદોડ ભરેલા જીવન અને બદલાતી જીવનશૈલી વચ્ચે ઘણા લોકોને અવારનવાર વાળ, ત્વચા અને નખને લગતી સમસ્યાઓનો સામનો કરવો પડે છે. વાળનું અતિશય ખરવું, વાળમાં રૂક્ષતા (ડ્રાયનેસ), ત્વચાનું બેજાન કે શુષ્ક બનવું અને નખ નબળા પડીને ઝડપથી તૂટી જવા જેવી તકલીફો સામાન્ય બની ગઈ છે. વાસ્તવમાં, આપણા વાળ, ત્વચા અને નખ માત્ર સુંદરતા સાથે જ નહીં, પરંતુ આપણા સમગ્ર શરીરના સ્વાસ્થ્ય સાથે પણ ઊંડાણપૂર્વક જોડાયેલા છે. આ ત્રણેયની તંદુરસ્તી જાળવી રાખવામાં આપણા આહારની ભૂમિકા અત્યંત મહત્વપૂર્ણ હોય છે.

આરોગ્ય નિષ્ણાતોના મતે, શરીરને વાળ, ત્વચા અને નખના યોગ્ય વિકાસ તથા સ્વાસ્થ્ય માટે પ્રોટીન, વિટામિન્સ, મિનરલ્સ અને હેલ્ધી ફેટ જેવા આવશ્યક પોષક તત્વોની આવશ્યકતા રહે છે. જો દૈનિક આહારમાં આ પોષક તત્વોની ઉણપ સર્જાય, તો તેની નકારાત્મક અસર સીધી આપણા વાળ, ત્વચા અને નખ પર સ્પષ્ટ જોવા મળે છે. તેથી, માત્ર બાહ્ય ક્રીમ કે પ્રોડક્ટ્સથી કાળજી રાખવાને બદલે આંતરિક પોષણ એટલે કે યોગ્ય આહાર પર ધ્યાન આપવું પણ એટલું જ જરૂરી છે.

હેલ્થલાઇનના રિપોર્ટ મુજબ, વાળ, ત્વચા અને નખની ઉત્તમ તંદુરસ્તી માટે દૈનિક આહારમાં નીચે મુજબના પદાર્થોનો સમાવેશ કરી શકાય છે,

ઈંડા અને માછલી: પ્રોટીન અને હેલ્ધી ફેટી એસિડથી ભરપૂર માછલી તથા ઈંડા વાળ, ત્વચા અને નખના સ્વાસ્થ્યને મજબૂત સપોર્ટ પૂરો પાડે છે.
દાળ અને બીન્સ: આ આયર્ન અને પ્રોટીનના ઉત્તમ સ્ત્રોત છે. શરીરમાં આયર્નની કમી સીધી રીતે વાળ પર અસર કરે છે, તેથી દાળ અને કઠોળનું સેવન ફાયદાકારક છે.
નટ્સ અને સીડ્સ : ડ્રાયફ્રુટ્સ અને વિવિધ બીજમાંથી શરીરને જરૂરી હેલ્ધી ફેટ અને મહત્વપૂર્ણ ખનિજ તત્વો મળી રહે છે.
લીલા શાકભાજી: વિટામિન્સ અને મિનરલ્સથી ભરપૂર શાકભાજી નવી કોષિકાઓ બનાવવામાં મદદ કરે છે, જે વાળ, ત્વચા અને નખ માટે અનિવાર્ય છે.

• આ ખરાબ ટેવો બગાડે છે સુંદરતા અને સ્વાસ્થ્ય

માત્ર પોષક તત્વોની કમી જ નહીં, પરંતુ કેટલીક દૈનિક આદતો પણ વાળ, ત્વચા અને નખની સેહતને મોટું નુકસાન પહોંચાડી શકે છે:

વધુ પડતી ખાંડ અને પ્રોસેસ્ડ ફૂડ: અતિશય ગળ્યા કે પ્રોસેસ્ડ ફાસ્ટ ફૂડનું સેવન ત્વચા અને વાળના સ્વાસ્થ્ય પર માઠી અસર કરે છે.
આલ્કોહોલનું સેવન: દારૂ કે અન્ય નશીલા પદાર્થોનું વધુ પડતું સેવન વાળને રૂક્ષ અને નિર્જીવ બનાવી દે છે, જેનાથી વાળ તૂટવાની સમસ્યા વધી જાય છે.
પૂરતી ઊંઘ ન લેવી: ઊંઘના અભાવે શરીરમાં સ્ટ્રેસ હોર્મોન્સનું પ્રમાણ વધી જાય છે. જેની અસર વાળના વિકાસ, ત્વચામાં સોજા (ઇન્ફ્લેમેશન) અને નખની મજબૂતાઈ પર પડે છે.
ક્રેશ ડાયેટિંગ: ખૂબ ઓછું ખાવું કે જરૂરી પોષક તત્વો વગરની ડાયેટ લેવાથી પણ વાળ ખરવાની સમસ્યા વિકસી શકે છે.

• આ લક્ષણોને જરાય ન કરો નજરઅંદાજ

જો તમારા વાળ અચાનક ખૂબ જ વધારે પ્રમાણમાં ખરવા લાગે, ગ્રોથ અટકી જાય અથવા વાળ સતત નબળા અને ડ્રાય થતા જાય, તો ચેતી જવું જરૂરી છે. આ ઉપરાંત, ત્વચા પર લાંબા સમય સુધી શુષ્કતા રહેવી, લાલાશ, ખંજવાળ કે વારંવાર દાણા થવા તથા નખનું નબળા પડીને વારંવાર તૂટવું એ સામાન્ય બાબત નથી.

આ પ્રકારના બદલાવો શરીરમા પોષક તત્વોની ઉણપ, બગડતી જીવનશૈલી કે અન્ય કોઈ આંતરિક સ્વાસ્થ્ય સમસ્યાને કારણે હોઈ શકે છે. તેથી, જાતે જ કોઈ સપ્લીમેન્ટ્સ લેવાનું શરૂ કરી દેવાને બદલે, જો આ લક્ષણો લાંબા સમય સુધી રહે તો તબીબ કે ડાયેટિશિયનની સલાહ લઈને સાચું કારણ જાણી યોગ્ય ઉપચાર કરવો હંમેશાં હિતાવહ છે.