નવી દિલ્હી, 27 ઓગસ્ટ 2026: પોતાની માત્ર ત્રીજી ટેસ્ટ મેચ રમી રહેલા માનવ સુથારે ICC ટેસ્ટ બોલિંગ રેન્કિંગમાં નોંધપાત્ર પ્રગતિ કરી છે. આ સ્પિનરે ICC રેન્કિંગમાં ભારતના ટોચના પાંચ બોલરોની યાદીમાં સ્થાન મેળવ્યું છે. ઈજાને કારણે શ્રીલંકા સામેની શ્રેણીમાં રમી ન શકનાર જસપ્રીત બુમરાહ ભારતીય બોલરોમાં મોખરે છે. બીજી તરફ, ઓસ્ટ્રેલિયાના ઝડપી બોલર મિશેલ સ્ટાર્ક ટેસ્ટ ક્રિકેટમાં વિશ્વના નંબર-વન બોલર બની ગયા છે.
સૂતારે જૂનમાં અફઘાનિસ્તાન સામે રમાયેલી એકમાત્ર ટેસ્ટ મેચમાં પદાર્પણ કર્યું હતું. તેમણે તે ટેસ્ટની પ્રથમ ઇનિંગ્સમાં 6 અને બીજી ઇનિંગ્સમાં 1 વિકેટ ઝડપી હતી, આમ પદાર્પણ વખતે કુલ 7 વિકેટ મેળવી હતી. તેમને ‘પ્લેયર ઓફ ધ મેચ’ જાહેર કરવામાં આવ્યા હતા. શ્રીલંકા સામે રમાયેલી પ્રથમ ટેસ્ટમાં પણ તેમણે પોતાની બોલિંગથી જબરદસ્ત પ્રભુત્વ જમાવ્યું હતું.
માનવ સુથારે ગાલેમાં રમાયેલી પ્રથમ ટેસ્ટમાં કુલ 10 વિકેટ ઝડપી હતી. જેમાં પ્રથમ દાવમાં 4 અને બીજા દાવમાં 6 વિકેટનો સમાવેશ થાય છે. આ ઉપરાંત, સિંહાલીઝ સ્પોર્ટ્સ ક્લબ ખાતે રમાઈ રહેલી બીજી ટેસ્ટના પ્રથમ દાવમાં પણ તેમણે 3 વિકેટ લીધી હતી. તેમના આ પ્રદર્શનનો લાભ તેમના રેન્કિંગને પણ મળ્યો છે.
માનવ સુતારની લાંબી છલાંગ
બુધવાર, 26 ઓગસ્ટના રોજ જાહેર થયેલા ICC ટેસ્ટ બોલિંગ રેન્કિંગમાં માનવ સુથારે નોંધપાત્ર પ્રગતિ કરી છે અને 28 સ્થાનની છલાંગ લગાવીને 48મા ક્રમે પહોંચ્યા છે. તેઓ હવે ભારતના ટોચના પાંચ બોલરોની યાદીમાં સામેલ થઈ ગયા છે. ભારતીય બોલરોમાં જસપ્રીત બુમરાહ પ્રથમ સ્થાને છે અને 862 પોઈન્ટ્સના રેટિંગ સાથે સમગ્ર યાદીમાં બીજા ક્રમે છે.
મોહમ્મદ સિરાજ બીજા સ્થાને છે; તાજેતરના રેન્કિંગમાં તે ચાર સ્થાન નીચે સરકીને 18મા ક્રમે પહોંચી ગયો છે. રવિન્દ્ર જાડેજા પણ ત્રણ સ્થાન નીચે આવીને 19મા ક્રમે પહોંચ્યો છે.
ભારતીય ખેલાડીઓમાં કુલદીપ યાદવ ચોથા ક્રમે છે; બીમારીને કારણે તે બીજી ટેસ્ટ મેચ રમી શક્યો નથી. રેન્કિંગમાં પણ તે 12 સ્થાન નીચે સરકીને 26મા ક્રમે પહોંચી ગયો છે.
ICC ટેસ્ટ બોલિંગ રેન્કિંગમાં ટોચના 5 ભારતીયો
જસપ્રિત બુમરાહ (2)
મોહમ્મદ સિરાજ (18)
રવિન્દ્ર જાડેજા (19)
કુલદીપ યાદવ (26)
માનવ સુથાર (48)
