ન્યૂઝીલેન્ડને હરાવી સતત બીજી વખત વિશ્વવિજેતા બનનાર ટીમ ઇન્ડિયા પૈસાનો વરસાદ
નવી દિલ્હી, 9 માર્ચ 2026: આઇસીસી મેન્સ ટી20 વર્લ્ડ કપ 2026ની ફાઇનલમાં ભારતે શાનદાર પ્રદર્શન કરતા ન્યૂઝીલેન્ડને 96 રનના મોટા અંતરથી હરાવીને ઐતિહાસિક જીત નોંધાવી છે. કેપ્ટન સૂર્યકુમાર યાદવની આગેવાનીમાં ટીમ ઇન્ડિયાએ ત્રીજી વખત ટી20 વર્લ્ડ કપનો ખિતાબ પોતાના નામે કર્યો છે. ખાસ વાત એ રહી કે ભારતે સતત બીજી વખત આ ટ્રોફી જીતી છે અને પહેલીવાર પોતાના જ ઘરમાં વિશ્વ ચેમ્પિયન બનવાનું ગૌરવ પ્રાપ્ત કર્યું છે. આ ઐતિહાસિક જીત સાથે ટીમ ઇન્ડિયાને માત્ર ટ્રોફી જ નહીં, પરંતુ માતબર ઇનામી રકમ પણ મળી છે. ઇન્ટરનેશનલ ક્રિકેટ કાઉન્સિલ દ્વારા આ ટુર્નામેન્ટ માટે કુલ 13.5 મિલિયન ડોલર એટલે કે અંદાજે 120 કરોડ રૂપિયાનું રેકોર્ડ પ્રાઇઝ પૂલ નક્કી કરવામાં આવ્યું હતું, જે અગાઉના સંસ્કરણ કરતા લગભગ 20 ટકા વધુ છે.
ટી20 વર્લ્ડ કપ 2026 જીત્યા બાદ ભારતીય ટીમને 3 મિલિયન ડોલર એટલે કે અંદાજે 27.5 કરોડ રૂપિયાની ઇનામી રકમ મળી છે. આ રકમ પહેલા ભારતીય ક્રિકેટ કંટ્રોલ બોર્ડને આપવામાં આવશે અને ત્યારબાદ ખેલાડીઓ વચ્ચે બોનસ, મેચ ફી અને અન્ય ઇનામોના રૂપમાં વહેંચવામાં આવશે. ફાઇનલમાં હારનો સામનો કરવા છતાં ન્યૂઝીલેન્ડની ટીમને પણ સારી એવી ઇનામી રકમ મળી છે. રનર-અપ ટીમ તરીકે ન્યૂઝીલેન્ડને 1.6 મિલિયન ડોલર એટલે કે અંદાજે 14.7 કરોડ રૂપિયા આપવામાં આવ્યા છે.
આ ટુર્નામેન્ટમાં સેમિફાઇનલ સુધીની સફર ખેડનારી ઇંગ્લેન્ડ અને સાઉથ આફ્રિકાની ટીમોને પણ મોટી રકમ મળી છે. બંને ટીમોને 7.9 લાખ ડોલર (અંદાજે 7.24 કરોડ રૂપિયા) ની ઇનામી રકમ આપવામાં આવી છે. ટુર્નામેન્ટના સુપર-8 તબક્કા સુધી પહોંચેલી ટીમોને પણ સારું ઇનામ મળ્યું છે. ઝિમ્બાબ્વે, પાકિસ્તાન, શ્રીલંકા અને વેસ્ટ ઇન્ડિઝને 3.8 લાખ ડોલર (અંદાજે 3.48 કરોડ રૂપિયા) મળ્યા છે. ICC એ આ વખતે તમામ 20 ટીમોને પ્રોત્સાહિત કરવા માટે ગ્રુપ સ્ટેજમાંથી બહાર થનારી ટીમોને પણ ઇનામ આપ્યું છે.
અફઘાનિસ્તાન, ઓસ્ટ્રેલિયા, કેનેડા, આયર્લેન્ડ, ઇટાલી, નામીબિયા, નેપાળ, નેધરલેન્ડ્સ, ઓમાન, સ્કોટલેન્ડ, યુએઈ અને અમેરિકાની ટીમોને 2.5 લાખ ડોલર (અંદાજે 2.3 કરોડ રૂપિયા) મળ્યા છે. સમગ્ર ટુર્નામેન્ટમાં પોતાના બેટથી બોલરોનો પરસેવો છોડાવનાર ભારતીય બેટ્સમેન સંજુ સેમસનને ‘પ્લેયર ઓફ ધ ટુર્નામેન્ટ’ તરીકે પસંદ કરવામાં આવ્યો છે. તેણે ફાઇનલ મેચમાં પણ 46 બોલમાં 89 રનની આક્રમક અને શાનદાર ઇનિંગ રમીને ટીમ ઇન્ડિયાની ઐતિહાસિક જીતમાં સૌથી મહત્વની ભૂમિકા ભજવી હતી.
