બળાત્કાર, ચોરી અને લૂંટ સહિતના ગુનાઓમાં નંબર 1 છે મુસ્લિમોઃ AIUDFના વડા બદરુદ્દીન અજમલ
નવી દિલ્હીઃ ઓલ ઈન્ડિયા યુનાઈટેડ ડેમોક્રેટિક ફ્રન્ટ (AIUDF)ના વડા બદરુદ્દીન અજમલે મુસ્લિમો પર વિવાદાસ્પદ ટિપ્પણી કરી છે. એક જાહેર સભાને સંબોધિત કરતી વખતે તેમણે પ્રશ્ન પૂછ્યો કે, મોટાભાગના મુસ્લિમો ગુનાહિત પ્રકૃતિ અને પૃષ્ઠભૂમિના કેમ છે? તેમણે કહ્યું કે, ‘ચોરી, બળાત્કાર, લૂંટ જેવા ગુનાઓમાં મુસ્લિમો નંબર વન કેમ છે, અમે જેલમાં કેમ નંબર વન છીએ? આ સમસ્યાનો જવાબ આપતા તેમણે કહ્યું કે, કારણ કે મોટાભાગના મુસ્લિમો ભણવા માંગતા નથી. પોતાના ધર્મના લોકોની આકરી ટીકાનો સામનો કર્યા પછી, AIUDF ચીફે કહ્યું, ‘મેં એવું કંઈ કહ્યું નથી જે કોઈપણ રીતે ખોટું હોય, મેં જે કહ્યું તે હકીકત છે.‘
AIUDF ચીફે કહ્યું કે, ‘મેં સમગ્ર વિશ્વમાં મુસ્લિમોમાં શિક્ષણનો અભાવ જોયો છે. મને ખૂબ દુઃખ છે કે અમારા બાળકો ભણતા નથી. તેઓ ઉચ્ચ અભ્યાસ માટે જતા નથી અને મેટ્રિક પાસ પણ કરી શકતા નથી. તેથી તે ગુનાની દુનિયા તરફ વળે છે. હું ઈચ્છું છું કે તે શક્ય તેટલો અભ્યાસ કરે અને ઉમદા માર્ગને અનુસરે.
બદરુદ્દીન અજમલે કહ્યું, ઘણા છોકરાઓ મહિલાઓને જોઈને ખરાબ વર્તન કરવા લાગે છે, મારો તેમના માટે એક જ સંદેશ છે કે આપણે મહિલાઓનું સન્માન કરવું જોઈએ. તેઓએ યાદ રાખવું જોઈએ કે તેમના પરિવારમાં પણ મહિલાઓ છે, જો તેઓ તેમની માતા અને બહેનો વિશે વિચારશે તો તેમના મગજમાં ક્યારેય ખોટું વર્તન નહીં આવે. તેમણે વધુમાં કહ્યું કે, વાસ્તવમાં આપણે આપણી ખામીઓ સરકાર પર ઢોળવાની કોશિશ કરીએ છીએ, આપણે આપણી અંદર પણ નથી જોતા, તેથી જ આપણા સમાજમાં સમસ્યાઓ ઘટવાને બદલે વધી રહી છે.
બદરુદ્દીન અજમલ આસામની રાજકીય પાર્ટી ઓલ ઈન્ડિયા યુનાઈટેડ ડેમોક્રેટિક ફ્રન્ટના વડા છે. બદરુદ્દીન વ્યવસાયે પરફ્યુમના બિઝનેસમેન છે. આસામમાં બંગાળી મુસ્લિમોમાં AIUDFનો સારો પ્રભાવ છે. આ જ કારણ છે કે 126 સભ્યોની આસામ વિધાનસભામાં AIUDF પાસે 15 ધારાસભ્યો છે.
