હોકીમાં ભારત માટે બે ઓલિમ્પિક મેડલ જીતનારા લલિત ઉપાધ્યાયે આંતરરાષ્ટ્રીય હોકીમાંથી નિવૃત્તિની જાહેરાત કરી છે. પોતાના ઇન્સ્ટાગ્રામ એકાઉન્ટ પર નિવૃત્તિની જાહેરાત કરતા લલિત ઉપાધ્યાયે લખ્યું કે, “હું આંતરરાષ્ટ્રીય હોકીમાંથી નિવૃત્તિની જાહેરાત કરું છું. આ સફર એક નાના ગામથી શરૂ થઈ હતી, જ્યાં મર્યાદિત સંસાધનો હતા પરંતુ સપનાઓ અમર્યાદિત હતા. સ્ટિંગ ઓપરેશનનો સામનો કરવાથી લઈને ઓલિમ્પિક પોડિયમ પર ઉભા રહેવા સુધી, એક વાર નહીં, પરંતુ બે વાર; તે પડકારો, વિકાસ અને અવિસ્મરણીય ગૌરવથી ભરેલો રસ્તો રહ્યો છે.”
લલિત ઉપાધ્યાયે આગળ લખ્યું કે, “26 વર્ષ પછી મારા શહેરમાંથી ઓલિમ્પિયન બનવું એ એવી વસ્તુ છે જેને હું હંમેશા આદર અને કૃતજ્ઞતાથી યાદ રાખીશ. હું મારા પરિવારનો ખૂબ આભારી છું, જેમણે જીવનના દરેક તબક્કે મને ટેકો આપ્યો.” તેમણે પોતાના ભાવનાત્મક મેસેજના અંતે લખ્યું કે, “હું મારા પહેલા કોચ પરમાનંદ મિશ્રાનો આભારી છું, જેમણે મને હોકીનો પરિચય કરાવ્યો. હરિન્દર સર, જેમણે મને એર ઇન્ડિયામાં પસંદગી કરીને મારો પહેલો બ્રેક આપ્યો. સમીરભાઈ અને ધનરાજ સરનો આભારી છું, જેમણે તે સમય દરમિયાન કાળજી અને વિશ્વાસ સાથે મને માર્ગદર્શન આપ્યું. ભારતીય જર્સી પહેરવાની તક આપવા બદલ હોકી ઇન્ડિયાનો આભાર. મારામાં વિશ્વાસ રાખનારા અને આ અદ્ભુત સફરમાં મારી સાથે ચાલનારા બધાનો આભાર.”
31 વર્ષીય લલિત ઉપાધ્યાય, જેમણે 2014માં સિનિયર રાષ્ટ્રીય ટીમ માટે ડેબ્યૂ કર્યું હતું, તેઓ ‘અર્જુન એવોર્ડ’ મેળવનાર છે. તેમને 2017માં ‘લક્ષ્મણ એવોર્ડ’ પણ એનાયત કરવામાં આવ્યો છે. FIH પ્રો લીગ સીઝન સમાપ્ત થયા પછી તરત જ લલિત ઉપાધ્યાયે નિવૃત્તિની જાહેરાત કરી છે. તેમણે 15 જૂને ઓસ્ટ્રેલિયા સામે પોતાની છેલ્લી મેચ રમી હતી. વારાણસીના રહેવાસી લલિત ઉપાધ્યાયે 2020 ટોક્યો ઓલિમ્પિકમાં ફોરવર્ડ ખેલાડી તરીકે ભારતને બ્રોન્ઝ મેડલ જીતવામાં મહત્ત્વપૂર્ણ ભૂમિકા ભજવી છે. આ પછી, તેમણે 2024 ઓલિમ્પિકમાં પણ બ્રોન્ઝ મેડલ જીતવામાં મહત્વપૂર્ણ ભૂમિકા ભજવી હતી.
