નવી દિલ્હી, 29 ઓગસ્ટ 2026: ભારત સરકાર દ્વારા સિંધુ જળ સંધિ પર અપનાવવામાં આવેલા કડક વલણને કારણે પાકિસ્તાનમાં પાણીની ગંભીર અછત સર્જાઈ છે. આ પરિસ્થિતિ વચ્ચે પાકિસ્તાને ફરી એકવાર આંતરરાષ્ટ્રીય સમુદાય સમક્ષ મધ્યસ્થતા માટે અપીલ કરી છે. અમેરિકા સ્થિત પાકિસ્તાની દૂતાવાસ દ્વારા આયોજિત એક વર્ચ્યુઅલ સેમિનારમાં પાકિસ્તાનના વિદેશ મંત્રી ઇશાક ડારે દાવો કર્યો હતો કે સિંધુ નદી પ્રણાલી તેમના દેશના 25 કરોડથી વધુ લોકોની જીવનરેખા છે. તેમણે એપ્રિલ 2025માં ભારત દ્વારા આ સંધિ સ્થગિત કરવાના નિર્ણય પર ગંભીર ચિંતા વ્યક્ત કરી હતી.
જમ્મુ-કાશ્મીરના પહલગામમાં એપ્રિલ 2025માં થયેલા ભયાનક આતંકવાદી હુમલામાં 26 નાગરિકોના મોત થયા હતા. આ સરહદ પારના આતંકવાદી હુમલા બાદ ભારત સરકારે સિંધુ જળ સંધિને સ્થગિત કરવાનો આકરો નિર્ણય લીધો હતો. ભારત સરકારે પોતાનું સ્પષ્ટ વલણ જાહેર કરતા જણાવ્યું હતું કે, “લોહી અને પાણી ક્યારેય એકસાથે વહી શકે નહીં.” ભારતે સ્પષ્ટ કર્યું છે કે જ્યાં સુધી પાકિસ્તાન પોતાની ધરતી પરથી ચાલતા આતંકવાદી નેટવર્ક સામે કાયમી અને નક્કર કાર્યવાહી નહીં કરે, ત્યાં સુધી આ સંધિ પુનઃસ્થાપિત કરવામાં નહીં આવે.
અમેરિકામાં સ્વીકાર કરતા ઇશાક ડારે જણાવ્યું હતું કે પાકિસ્તાનની કૃષિ, ખાદ્ય સુરક્ષા, વીજ ઉત્પાદન અને આર્થિક વિકાસ સંપૂર્ણપણે સિંધુ નદીના પાણી પર નિર્ભર છે. ગ્લોબલ વોર્મિંગ અને દુષ્કાળ જેવી સમસ્યાઓ વચ્ચે જળ સુરક્ષા હવે પાકિસ્તાન માટે રાષ્ટ્રીય સુરક્ષાનો મુદ્દો બની ગઈ છે. એક તરફ પાકિસ્તાન પાણી માટે આંતરરાષ્ટ્રીય મંચો પર અપીલ કરી રહ્યું છે, તો બીજી તરફ સંધિ પૂર્વવત્ત ન થાય તો દક્ષિણ એશિયાની શાંતિ જોખમાવાની ધમકી પણ આપી રહ્યું છે.
પાકિસ્તાનની વારંવારની ગગડતી અપીલો અને ધમકીઓ છતાં નવી દિલ્હી પોતાના નિર્ણય પર મક્કમ છે. ભારત સરકારે સ્પષ્ટ સંકેત આપ્યા છે કે આતંકવાદ અને દ્વિપક્ષીય વાતચીત કે સહયોગ ક્યારેય સાથે ન ચાલી શકે. આતંકવાદ સામે કોઈપણ કિંમતે નમતું ન જોખવાના ભારતના આ મક્કમ વલણને કારણે પાકિસ્તાન માટે પાણીની કટોકટી હવે અસ્તિત્વનો મોટો સવાલ બની ગઈ છે.
