મથુરા રેલવે સ્ટ્રેશન ઉપર પેસેન્જર ટ્રેન પ્લેટફોર્મ ઉપર ચડી, સદનસીબે મોટી દૂર્ઘટના ટળી

લખનૌઃ ઉત્તરપ્રદેશના મથુરામાં રેલવે સ્ટેશન ઉપર ટ્રેન દૂર્ઘટના સર્જાઈ હતી. મથુરા જંકશન ઉપર આવેલી એક ટ્રેન મુસાફરોને ઉતારવા માટે ધીમી પડી હતી. જો કે, ગણતરીની સેકન્ડમાં જ અચાનક ફરીથી ચાલુ થઈને ઈએમયુ પ્લેટફોર્મ નંબર બે ઉપર ચડી ગઈ હતી. જેથી પ્રસાવીઓમાં ફફડાટ ફેલાઈ ગયો હતો અને નાસભાગ મચી ગઈ હતી. જો કે, સદનસીબે મોટી દૂર્ઘટના સર્જાઈ ન હતી. આરપીએફની ટીમ પણ તાત્કાલિક સ્થળ પર દોડી ગઈ હતી.

પ્રાપ્ત માહિતી અનુસાર ગાઝીયાબાદથી નીકળેલી ટ્રેન મથુરા જંકશન પર પહોંચી હતી અને ઈએમયુ પ્લેટફોર્મ નંબર 2 રોકાઈ હતી. જો કે, થોડી સેકન્ડ રોકાયા બાદ ટ્રેન અચાનક દોડવા લાગી હતી અને પ્લેટફોર્મને તોડીને ઉપર ચડી ગઈ હતી. બનાસ સમયે પ્લેટફોર્મ ઉપર આંગડીને વેઢે ગણી શકાય તેટલા જ પ્રવાસી હતા. તેમજ અચાનક ટ્રેન દોડવા લાગતા પ્રવાસીઓ પણ જીવ બચાવીને બાગ્યાં હતા. દરમિયાન ટ્રેન સામેના ઓએચઆઈ લાઈનના એક થાંભલા સાથે અથડાઈને રોકાઈ ગઈ હતી.

દૂર્ઘટનાને પગલે મથુરા-દિલ્હી વચ્ચેનો રેલ વ્યવહાર અટકાવ્યો હતો. માલવા સુપરફાસ્ટ, અમૃતસર-બાંદ્રા ટર્મિનસ સહિત કેટલીક ટ્રેનોને દિલ્હી તરફ રોકી દેવામાં આવી હતી. આ બનાવની જાણ થતા રેલવેના ઉચ્ચ અધિકારીઓ તાત્કાલિક સ્થળ પર દોડી ગયા હતા. રિપોર્ટ અનુસાર ચાલકે ટ્રેનની બ્રેકને બદલે એક્સિલેટર દબાવતા આ દૂર્ઘટના સર્જાયાનું મનાઈ રહ્યું છે. જો કે, રેલવે વિભાગ દ્વારા અકસ્માતને લઈને તપાસ શરૂ કરવામાં આવી છે. તપાસ બાદ જ અકસ્માતનું ચોક્કસ કારણ જાણી શકાશે.