રેસીપી, 26 સપ્ટેમ્બર 2026: રોટલી કે ભાત સાથે કઢીનો સ્વાદ અદભૂત લાગે છે. ઉત્તર પ્રદેશ, મધ્ય પ્રદેશ, રાજસ્થાન, હરિયાણા, બિહાર, પંજાબ અને ગુજરાત જેવા ભારતીય રાજ્યોમાં આ એક ખૂબ જ લોકપ્રિય વાનગી છે. તે ખાવામાં જેટલી સ્વાદિષ્ટ લાગે છે, બનાવવામાં પણ તેટલી જ સરળ હોય છે. વિવિધ પ્રદેશોમાં કઢી બનાવવાની અલગ-અલગ રીતો છે. રાજસ્થાની ‘કાળા ચણા’ની કઢીની રેસીપી જણો, જે પકોડા વગર બનાવવામાં આવે છે. તમને તેનો સ્વાદ ચોક્કસ ગમશે.
કાળા ચણાની કઢીની રેસીપી
કાળા ચણાની કઢી બનાવવા માટે જરૂરી માત્રામાં કાળા ચણા લો. અહીં અમે 1 કપ ચણાનો ઉપયોગ કરી રહ્યા છીએ. ચણાને સારી રીતે ધોઈ લો અને આખી રાત પાણીમાં પલાળી રાખો. ત્યારબાદ પાણી નિતારી લો અને ચણાને પ્રેશર કૂકરમાં થોડા તાજા પાણી અને સહેજ મીઠા સાથે પકાવો. ચણા નરમ થાય ત્યાં સુધી તેને રાંધો મધ્યમ આંચ પર લગભગ 4 સીટી પૂરતી રહેશે. ચણા રંધાઈ જાય પછી ગળણીની મદદથી તેનું બધું પાણી નિતારી લો.
હવે કઢીના મુખ્ય આધાર તરીકે દહીં અથવા છાસ લો. તેમાં હળદર, લાલ મરચું, ધાણાજીરું પાવડર અને ચણાનો લોટ (બેસન) ઉમેરો. બધી સામગ્રીને સારી રીતે મિક્સ થાય ત્યાં સુધી મિક્સ કરી લો. ત્યારબાદ જરૂર મુજબ પાણી ઉમેરીને મિશ્રણને પાતળું કરો (જેમ કે ખીરું કે બેટર હોય છે).
એક પેન અથવા કડાઈમાં દેશી ઘી ગરમ કરો. તેમાં જીરું, હિંગ અને સૂકા લાલ મરચાં ઉમેરીને થોડીવાર સાંતળો. પછી વચ્ચેથી ચીરા પાડેલા લીલાં મરચાં, મીઠો લીમડો (કઢી પત્તા) અને ઝીણા સમારેલા આદુ-લસણ ઉમેરો. આ સામગ્રીને લગભગ એક મિનિટ સુધી સાંતળો અને ત્યારબાદ તૈયાર કરેલું દહીં-બેસનનું મિશ્રણ તેમાં રેડો. જ્યાં સુધી કઢી ઉકળવા ન લાગે ત્યાં સુધી તેને સતત હલાવતા રહો. ઉકળવા લાગે એટલે તેમાં બાફેલા ચણા અને મીઠું ઉમેરો. હવે પેનને ઢાંકી દો અને કઢીને ધીમી આંચ પર 10 મિનિટ સુધી ઉકળવા (સીઝવા) દો.
હવે 10 મિનિટ પછી તેમાં કસૂરી મેથી, ઝીણી સમારેલી તાજી કોથમીર અને ગરમ મસાલો ઉમેરો. બધું બરાબર મિક્સ કરી લો. તમારી સ્વાદિષ્ટ રાજસ્થાની કાળા ચણાની કઢી તૈયાર છે. તમે તેને રોટલી કે ભાત સાથે માણી શકો છો. પકોડાવાળી કઢી કરતાં આ કઢીનો સ્વાદ ઘણો વધારે સારો હોય છે.
