મુંબઈ: ભાજપના ધારાસભ્ય સંજય કેનેકરે માંગ કરી હતી કે છત્રપતિ શાહુજી મહારાજ રેલ્વે સ્ટેશન પરના બોર્ડ પરથી ઉર્દૂ લિપિમાં લખાયેલ ‘છત્રપતિ સંભાજીનગર’ નામ દૂર કરવામાં આવે. બીજી તરફ, કોંગ્રેસ મુંબઈમાં મેટ્રો સ્ટેશનોના નામકરણનો વિરોધ કરી રહી છે.
ગયા અઠવાડિયે, સરકારે ઔરંગાબાદ રેલ્વે સ્ટેશનનું નામ બદલીને છત્રપતિ સંભાજીનગર સ્ટેશન રાખવાનું જાહેરનામું બહાર પાડ્યું હતું. ત્રણ વર્ષ પહેલાં, શહેરનું નામ બદલીને છત્રપતિ સંભાજી નગર રાખવામાં આવ્યું હતું.
મહારાષ્ટ્ર વિધાન પરિષદના સભ્ય કેનેકરે કહ્યું “જો સૂચનામાં ભાષા (ઉર્દૂ)નો ઉલ્લેખ નથી, તો બોર્ડ પર તે ભાષા કેમ લખવામાં આવી રહી છે? સૂચનામાં ફક્ત હિન્દી, અંગ્રેજી અને મરાઠીનો ઉલ્લેખ છે. ઉર્દૂમાં નામ જોઈને મને આશ્ચર્ય થયું.”
તમને જણાવી દઈએ કે છત્રપતિ સંભાજીનગર, જે થોડા વર્ષો પહેલા ઔરંગાબાદ તરીકે ઓળખાતું હતું, તે 1948 સુધી હૈદરાબાદના નિઝામ રાજ્યનો ભાગ હતું.
ઓલ ઈન્ડિયા મજલિસ-એ-ઇત્તેહાદુલ મુસ્લિમીન (AIMIM) મહારાષ્ટ્રના પ્રમુખ અને ભૂતપૂર્વ સાંસદ ઇમ્તિયાઝ જલીલે ઉર્દૂ લિપિમાં નામ લખવાના ભાજપના નેતાના વિરોધ પર આકરી પ્રતિક્રિયા આપી છે.