અબકી બાર ડૉલર સામે રૂપિયો 95ને પાર, શેરબજાર પણ પટકાયું

મુંબઈ,30 માર્ચ, 2026:  Rupee crosses Rs 95 against dollar સોમવારે સવારના સમયે રૂપિયામાં 128 પૈસાનો જોરદાર ઉછાળો જોવા મળ્યો હતો, ત્યારે કોઈને આશા નહોતી કે રૂપિયો ફરી એકવાર ધરાશાયી થઈ જશે. પરંતુ બપોર સુધીમાં કરન્સી માર્કેટે એવી ચાલ બદલી કે સૌ કોઈ હેરાન રહી ગયા. ડોલર સામે રૂપિયો પ્રથમ વખત માત્ર 95 ના સ્તરને પાર જ નથી કરી ગયો, પરંતુ તેણે અત્યાર સુધીના સૌથી નીચલા સ્તરનો નવો રેકોર્ડ પણ બનાવ્યો છે.

ખાસ વાત તો એ છે કે દિવસની ઊંચી સપાટીથી રૂપિયામાં 2.33 રૂપિયાનો ઘટાડો જોવા મળ્યો હતો. રૂપિયામાં આવેલા આ ઘટાડાને કારણે શેરબજાર પણ તૂટતું જોવા મળી રહ્યું છે. આંકડાઓ પર નજર કરીએ તો આગામી દિવસોમાં રૂપિયામાં હજુ પણ ઘટાડો જોવા મળી શકે છે.

આ પણ વાંચોઃ ધુરંધર થિયેટરમાં જોવાનું ચૂકી ગયા હતા? ચિંતા નહીં, હવે તમારા ઘરે ટીવીમાં જ જોઈ શકશો

પ્રથમ વખત 95 ને પાર

સોમવારે બપોર પછી ડોલર સામે રૂપિયામાં જબરદસ્ત ઘટાડો જોવા મળ્યો હતો. investing.com ના આંકડા મુજબ, ડોલર સામે રૂપિયો બપોરે 3 વાગ્યે ને 20 મિનિટે 0.41% ના ઘટાડા સાથે 95.157 ના સ્તર પર ટ્રેડ કરી રહ્યો હતો. જ્યારે કારોબારી સત્ર દરમિયાન રૂપિયો ડોલર સામે 95.58 ના સ્તર સાથે તેના ઓલ ટાઈમ લો (Life Time Low) સ્તર પર પહોંચી ગયો હતો. જાણકારોનું માનવું છે કે આગામી દિવસોમાં ડોલર સામે રૂપિયો હજુ પણ નબળો પડી શકે છે.

દિવસની હાઈ સપાટીથી 2.33 રૂપિયાનો ઘટાડો

આંકડા મુજબ, રૂપિયો 93.247 ના સ્તર સાથે મજબૂત થયો હતો, પરંતુ ત્યારબાદ તેમાં 2.33 રૂપિયાનો ઘટાડો જોવા મળ્યો અને તે 95.58 ના સ્તરે પહોંચી ગયો. નોંધનીય છે કે આશરે 1 વર્ષમાં ડોલર સામે રૂપિયામાં લગભગ 12 રૂપિયાનો ઘટાડો થયો છે. ઇન્ટરબેંક ફોરેન એક્સચેન્જમાં રૂપિયો 93.62 પર ખૂલ્યો હતો અને ત્યારબાદ તે વધીને 93.57 પર પહોંચ્યો હતો, જે અગાઉના બંધ સ્તરથી 128 પૈસાનો વધારો દર્શાવતો હતો. શુક્રવારે રૂપિયો 89 પૈસાના ઘટાડા સાથે 94.85 ની ઐતિહાસિક નીચી સપાટીએ બંધ રહ્યો હતો.

આ પણ વાંચોઃ વસ્તી ગણતરી-2027નો તખ્તો તૈયાર, જાણો અહીં તમામ વિગતો

ઘટાડા પાછળનાં કારણો

ફોરેક્સ ટ્રેડર્સે જણાવ્યું હતું કે USD/INR જોડી પર ડોલર ઇન્ડેક્સની મજબૂતી અને કાચા તેલની કિંમતોનું દબાણ છે. ‘સેફ-હેવન’ (સુરક્ષિત રોકાણ) ની માંગને કારણે ડોલર ઇન્ડેક્સ 100 ના સ્તરથી ઉપર મજબૂત રહ્યો છે. આ ઉપરાંત, વધતા ભૌગોલિક-રાજકીય તણાવની અસર તેલની કિંમતો પર પડી છે. સપ્લાય ખોરવાવાની આશંકા વચ્ચે બ્રેન્ટ ક્રૂડના ભાવમાં ઉછાળો આવ્યો છે. વૈશ્વિક પરિસ્થિતિઓમાં ભારતની ઊર્જા સુરક્ષા માટે કાચા તેલના વધતા ભાવ એક મહત્ત્વનો પડકાર છે.

શેરબજારમાં મોટો કડાકો

કરન્સી માર્કેટની અસર શેરબજાર પર પણ જોવા મળી હતી. સેન્સેક્સ 1,733.78 પોઈન્ટ ઘટીને 71,849.44 પર આવી ગયો હતો, જ્યારે નિફ્ટી 528.45 પોઈન્ટ ઘટીને 22,291.15 પર બંધ થયો હતો. ડોલર ઇન્ડેક્સ 100.30 પર ટ્રેડ કરી રહ્યો હતો, જ્યારે બ્રેન્ટ ક્રૂડ 2.60% ના વધારા સાથે 115.50 ડોલર પ્રતિ બેરલ પર પહોંચી ગયું હતું. વિદેશી સંસ્થાકીય રોકાણકારોએ શુક્રવારે શુદ્ધ આધારે 4,367.30 કરોડ રૂપિયાના શેર વેચ્યા હતા. રોકાણકારો માટે હાલની સ્થિતિમાં ધીરજ સાથે ઊભા રહેવું અને વાજબી નિર્ણયો લેવા અત્યંત જરૂરી છે. જોખમ ઘટાડવા માટે લઘુતમ એક્સપોઝર રાખવું હિતાવહ હોઈ શકે છે.

આ પણ વાંચોઃ “સ્વતંત્રતા સંગ્રામમાં કોઈપણ ગુજરાતી નહોતા”: ટીએમસી સાંસદ મહુઆ મોઈત્રાના નિવેદનથી વિવાદ