આદિત્ય L1 અવકાશયાનમાં સ્થાપિત સોલાર વિન્ડ પાર્ટિકલ એક્સપેરીમેન્ટ પેલોડે કામ કરવાનું શરૂ કર્યુંઃ ઈસરો
બેંગલુરુઃ ભારતના આદિત્ય-એલ1 સેટેલાઈટ પર પેલોડ ‘આદિત્ય સોલર વિન્ડ પાર્ટિકલ એક્સપેરીમેન્ટ’ કામ કરવાનું શરૂ કરી દીધું છે અને સામાન્ય રીતે કામ કરી રહ્યું છે. તેમ ઈન્ડિયન સ્પેસ રિસર્ચ ઓર્ગેનાઈઝેશન (ISRO) એ શનિવારે જણાવ્યું હતું. ISRO એ 2 સપ્ટેમ્બરે શ્રીહરિકોટાના સતીશ ધવન સ્પેસ સેન્ટરમાંથી આદિત્ય-L1 અવકાશયાન સફળતાપૂર્વક લોન્ચ કર્યું હતું.
ઈસરોના જણાવ્યા મુજબ, ‘આદિત્ય-એલ1’ સૂર્યનો અભ્યાસ કરનાર પ્રથમ અવકાશ-આધારિત વેધશાળા છે. તે પૃથ્વીથી લગભગ 1.5 મિલિયન કિલોમીટરના અંતરે સ્થિત લેગ્રાંગિયન બિંદુ ‘L1’ ની આસપાસના પ્રભામંડળમાંથી સૂર્યનો અભ્યાસ કરી રહ્યું છે.
ISROએ જણાવ્યું હતું કે આદિત્ય સોલર વિન્ડ પાર્ટિકલ એક્સપેરિમેન્ટ (ASPEX) બે અત્યાધુનિક સાધનો સોલાર વિન્ડ આયન સ્પેક્ટ્રોમીટર (SWIS) અને સુપરથર્મલ અને એનર્જેટિક પાર્ટિકલ સ્પેક્ટ્રોમીટર (STEPS) ધરાવે છે.
STEPS ટૂલ 10 સપ્ટેમ્બર, 2023 ના રોજ લોન્ચ કરવામાં આવ્યું હતું. SWIS ટૂલ નવેમ્બર 2, 2023 ના રોજ સક્રિય કરવામાં આવ્યું હતું અને તેણે સારું પ્રદર્શન કર્યું છે. ISROના જણાવ્યા અનુસાર ઉપકરણે સૌર પવન આયન, મુખ્યત્વે પ્રોટોન અને આલ્ફા કણોને સફળતાપૂર્વક માપ્યા છે.
અત્રે ઉલ્લેખનીય છે કે, ઈસરોના ચંદ્રયાન-2ની સફળતાની સમગ્ર દુનિયાએ નોંધ લીધી હતી. ચંદ્રયાન-2 સફળતા પૂર્વક ચંદ્રની દક્ષિણ સપાટી ઉપર ઉતર્યું હતું. ચંદ્રની દક્ષિણ સપાટી ઉપર ઉતરનાર ભારત પ્રથમ દેશ છે. આ પહેલા ચંદ્ર ઉપર પહોંચવામાં રશિયા, અમેરિકા અને ચીનને સફળતા મળી હતી. આ ચંદ્ર ઉપર પહોંચનારો ભારત ચોથો દેશ બની ગયો છે. ચંદ્રયાન-2 પછી ઈસરોએ સૂર્યના અભ્યાસ અર્થે આદિત્ય એલ-1નું લોન્ચિંગ કર્યું હતું.
