શેર બજાર લીલા નિશાનમાં બંધ: સેન્સેક્સ અને નિફ્ટીમાં સુધારો, ઓટો-રિયલ્ટી શેરો ચમક્યા

મુંબઈ, 25 સપ્ટેમ્બર 2026: અગાઉના દિવસે થયેલા મોટા કડાકા બાદ સપ્તાહના આખરી કારોબારી દિવસે શુક્રવારે ભારતીય શેરબજાર સુધારા સાથે લીલા નિશાનમાં બંધ રહ્યું હતું. કારોબાર દરમિયાન અગ્રણી બેન્ચમાર્ક સૂચકાંક નિફ્ટી અને સેન્સેક્સમાં 0.43 ટકા સુધીનો ઉછાળો જોવા મળ્યો હતો. પશ્ચિમ એશિયામાં સતત થઈ રહેલા હુમલાઓ વચ્ચે અમેરિકા-ઈરાન યુદ્ધવિરામની આશાઓને કારણે કાચા તેલ (ક્રૂડ ઓઇલ)ની કિંમતોમાં ઘટાડો નોંધાયો હતો, જેના પગલે મુખ્ય બેન્ચમાર્ક ઇન્ડેક્સ દિવસની ઉપલી સપાટીની નજીક બંધ રહ્યા હતા.

શુક્રવારે BSE સેન્સેક્સ 315.20 પોઇન્ટ એટલે કે 0.43 ટકા વધીને 73,895.74 ની સપાટીએ પહોંચ્યો હતો. બીજી તરફ NSE નિફ્ટી 50 ઇન્ડેક્સ 77.40 પોઇન્ટ એટલે કે 0.34 ટકાના સુધારા સાથે 23,140.50 ની સપાટીએ બંધ રહ્યો હતો. દિવસ દરમિયાન સેન્સેક્સ અગાઉના બંધ 73,580.54 ની સરખામણીએ મામૂલી 54.61 પોઇન્ટ ઘટીને 73,525.92 પર ખુલ્યો હતો અને કારોબારી સત્ર દરમિયાન 387.51 પોઇન્ટ (0.52%) ના ઉછાળા સાથે 73,968.05 ની ઇન્ટ્રા-ડે હાઇ સપાટીએ પહોંચ્યો હતો. તેવી જ રીતે, નિફ્ટી અગાઉના બંધની સરખામણીએ 28 પોઇન્ટ (0.12%) ઘટીને 23,035 પર ખુલ્યા બાદ ઇન્ટ્રા-ડે ટ્રેડિંગમાં 99.60 પોઇન્ટ (0.43%) ના વધારા સાથે 23,162.70 ની સર્વોચ્ચ સપાટીએ સ્પર્શ્યો હતો.

• સેક્ટર વાઇઝ દેખાવ અને બ્રોડર માર્કેટ

બ્રોડર માર્કેટમાં મિશ્ર કારોબાર જોવા મળ્યો હતો. નિફ્ટી મિડકેપ 100 માં 0.14 ટકાનો ઘટાડો નોંધાયો હતો, જ્યારે નિફ્ટી સ્મોલકેપમાં 0.15 ટકાનો સુધારો જોવા મળ્યો હતો. સેક્ટર વાઇઝ પ્રદર્શન જોઈએ તો નિફ્ટી રિયલ્ટી અને નિફ્ટી ઓટોમાં સૌથી વધુ તેજી જોવા મળી હતી, જ્યારે નિફ્ટી સિમેન્ટ, નિફ્ટી મીડિયા, નિફ્ટી IT અને નિફ્ટી ફાર્મા સેક્ટરમાં સૌથી વધુ ઘટાડો નોંધાયો હતો.

• ટોપ ગેઇનર્સ અને લૂઝર્સ

નિફ્ટી-50 માં એક્સિસ બેંક, એશિયન પેઇન્ટ્સ, મહિન્દ્રા એન્ડ મહિન્દ્રા, બજાજ ફાઇનાન્સ, એચસીએલ ટેક, પાવરગ્રીડ, ટાઇટન અને ઇન્ડિગોના શેર ટોપ ગેઇનર્સની યાદીમાં સામેલ રહ્યા હતા. બીજી તરફ મેક્સ હેલ્થ, TMPV (ટાટા મોટર્સ પીવી), ઇન્ફોસિસ, ONGC અને ટ્રેન્ટના શેરમાં સૌથી વધુ કડાકો બોલાયો હતો.

કાચા તેલના ભાવમાં ઉતાર-ચઢાવ અને બોન્ડ યીલ્ડ ઊંચા સ્તરે જળવાઈ રહેવાના કારણે બજારમાં રિકવરી મર્યાદિત રહી હતી. મોંઘવારી, વિદેશી ભંડોળ (FII) ની સતત ઉપાડ અને ઇમર્જિંગ માર્કેટ્સ (EM) ના ચલણ પરના દબાણ અંગેની ચિંતાઓ યથાવત રહી હતી. જોકે, તાજેતરના કડાકા બાદ પસંદગીના શેરોમાં સસ્તા ભાવે થયેલી ખરીદીથી બજારનું વલણ સકારાત્મક બન્યું હતું.