મહિલા પ્રીમિયર લીગ 2025 (WPL 2025) 14 ફેબ્રુઆરીથી શરૂ થવાની છે અને આ ટુર્નામેન્ટ 15 માર્ચ સુધી ચાલશે. સિઝન શરૂ થવાના થોડા દિવસો પહેલા જ, ભારતની સ્ટાર ખેલાડી દીપ્તિ શર્માને યુપી વોરિયર્સની કેપ્ટન જાહેર કરવામાં આવી છે. ટીમની નિયમિત કેપ્ટન એલિસા હીલી ઘાયલ થયા બાદ આ નિર્ણય લેવામાં આવ્યો છે. જમણા પગમાં ઈજાને કારણે એલિસા ટુર્નામેન્ટમાંથી બહાર થઈ ગઈ છે. હવે તેમના સ્થાને દીપ્તિ શર્મા ટીમની કેપ્ટનશીપ કરશે.
દીપ્તિ શર્મા 2023 થી યુપી વોરિયર્સ માટે રમી રહી છે અને આ ટીમની સૌથી સફળ ખેલાડીઓમાંની એક છે. દીપ્તિ WPLમાં યુપી માટે બીજા ક્રમે સૌથી વધુ વિકેટ લેનાર બોલર છે, તેણીએ અત્યાર સુધીમાં 17 મેચોમાં 19 વિકેટ લીધી છે. તે ટીમ માટે ત્રીજા ક્રમના સૌથી વધુ રન બનાવનાર ખેલાડી પણ છે. તેણે WPLમાં UP માટે અત્યાર સુધીમાં 16 ઇનિંગ્સમાં 385 રન બનાવ્યા છે. દીપ્તિ માટે કેપ્ટનશીપ મેળવવી એ કોઈ નવી વાત નથી કારણ કે તે પહેલાથી જ સ્થાનિક સ્તરે બંગાળ ટીમનું નેતૃત્વ કરી ચૂકી છે. યુપી વોરિયર્સે એલિસા હીલીના સ્થાને વેસ્ટ ઈન્ડિઝની ઓલરાઉન્ડર ચિનેલ હેનરીને સ્થાન આપ્યું છે.
WPL 2025 પહેલા એલિસા હીલીની ઈજા યુપી વોરિયર્સ માટે મોટો આંચકો છે. એલિસા WPLમાં UP માટે સૌથી વધુ રન બનાવનાર ખેલાડી છે. આ લીગના ઇતિહાસમાં અત્યાર સુધીમાં તેણે 17 ઇનિંગ્સમાં 428 રન બનાવ્યા છે. એલિસા તાજેતરના ભૂતકાળમાં ઇજાઓ સામે ઝઝૂમી રહી છે કારણ કે તે એશિઝ શ્રેણીના T20 લેગમાં રમી શકી ન હતી. તે મેલબોર્ન ક્રિકેટ ગ્રાઉન્ડ પર રમાયેલી ટેસ્ટ મેચનો ભાગ હતી પરંતુ વિકેટકીપિંગ કરતી નહોતી.