ટ્વિટરે ભારતમાં તેની 2 ઓફિસ કરી બંધ,કંપનીએ ઘરેથી કામ કરવાનો આપ્યો આદેશ  

દિલ્હી:જ્યારથી એલન મસ્કે માઈક્રોબ્લોગિંગ સાઈટ ટ્વિટરનો હવાલો સંભાળ્યો છે ત્યારથી કંપનીમાં ઘણા મોટા ફેરફારો થઈ રહ્યા છે.બીજી તરફ શુક્રવારે (17 ફેબ્રુઆરી) ટ્વિટર સાથે જોડાયેલા મોટા સમાચાર સામે આવ્યા છે. ટ્વિટરે ભારતમાં તેની ત્રણમાંથી બે ઓફિસ બંધ કરી દીધી છે. કંપની વતી કર્મચારીઓને ઘરેથી કામ કરવા માટે કહેવામાં આવ્યું છે.

ટ્વિટરે દિલ્હી અને મુંબઈમાં તેની ઓફિસ બંધ કરી દીધી છે. ટ્વિટરની બેંગ્લોર ઓફિસમાં મુખ્યત્વે એન્જિનિયરિંગ સ્ટાફ છે.આ મામલાની જાણકારી ધરાવતા સૂત્રોએ જણાવ્યું કે દિલ્હી અને મુંબઈની ઓફિસ થોડા અઠવાડિયા પહેલા બંધ થઈ ગઈ હતી અને તેમના કર્મચારીઓ હવે ઘરેથી કામ કરી રહ્યા છે.આ પગલાથી પ્રભાવિત કર્મચારીઓની સંખ્યા તાત્કાલિક જાણી શકાઈ નથી.ટ્વિટર પર ઈમેલ દ્વારા મોકલવામાં આવેલા પ્રશ્નો અંગે સમાચાર લખાય છે ત્યાં સુધી કોઈ જવાબ મળ્યો ન હતો.

ટ્વિટરના નવા માલિક ઉદ્યોગપતિ એલન મસ્કે અગાઉ કહ્યું હતું કે કંપની દરરોજ લાખો ડોલર ગુમાવી રહી છે અને તેની પાસે છૂટછાટ અને ખર્ચ ઘટાડવા સિવાય કોઈ વિકલ્પ બચ્યો નથી. મસ્કે ટ્વિટરને $44 બિલિયનમાં હસ્તગત કર્યા પછી સામૂહિક છટણી શરૂ થઈ.ટ્વિટરે તેની વૈશ્વિક વર્કફોર્સ રિડક્શન પ્લાનના ભાગરૂપે ભારતમાં તેના મોટાભાગના કર્મચારીઓને છૂટા કરી દીધા છે.આ છટણી પહેલા, કંપનીના ભારતમાં 200 થી વધુ કર્મચારીઓ કામ કરતા હતા.