ઉત્તરપ્રદેશના સપાના નેતા આઝમ ખાનની મુશ્કેલી વધી, અન્ય કેસમાં કોર્ટે દોષિત જાહેર કર્યાં

લખનૌઃ ઉત્તરપ્રદેશમાં ડુંગરપુર બસ્તી કેસના અન્ય એક કેસમાં કોર્ટે સપા નેતા આઝમ ખાનને દોષિત જાહેર કર્યા છે. આઝમ ખાન હાલ અન્ય કેસમાં જેલમાં બંધ છે. ડુંગરપુર કોલોની ખાલી કરાવવાના મામલે 12 લોકોએ કેસ દાખલ કર્યો હતો. આમાં આઝમ ખાનને આરોપી બનાવવામાં આવ્યા હતા. રામપુરના ડુંગરપુર બસ્તી કેસના વધુ એક કેસમાં કોર્ટે સપા નેતા આઝમ ખાનને ફરી આંચકો આપ્યો છે. બુધવારે સુનાવણી દરમિયાન કોર્ટે તેમને આ કેસમાં દોષિત જાહેર કર્યો હતો. આવતીકાલે ગુરુવારે સજા સંભળાવવામાં આવશે.

કેસની હકીકત અનુસાર, 2019 માં, ડુંગરપુરમાં રહેતા લોકોએ કોલોની ખાલી કરાવવાના નામે લૂંટ, ચોરી, હુમલો અને અન્ય આરોપો જેવી કલમો હેઠળ ગંજ પોલીસ સ્ટેશનમાં એસપી નેતા આઝમ ખાન વિરુદ્ધ 12 અલગ-અલગ કેસ દાખલ કર્યા હતા. જેમાંથી ત્રણ કેસમાં ચુકાદો આવ્યો છે. બે કેસમાં સપા નેતાને નિર્દોષ જાહેર કરવામાં આવ્યા છે, જ્યારે એક કેસમાં સપા નેતાને સાત વર્ષની જેલની સજા ફટકારવામાં આવી છે. સપા નેતા હાલ સીતાપુર જેલમાં બંધ છે. બુધવારે કોર્ટે આ મામલામાં આઝમ ખાન અને કોન્ટ્રાક્ટરને દોષિત જાહેર કર્યા છે. આ કેસમાં કોર્ટ આવતીકાલે સપા નેતા આઝમ ખાન અને કોન્ટ્રાક્ટર બરકત અલીને સજા સંભળાવશે.

ડુંગરપુરના રહેવાસી અબરાર હુસૈને 13 ઓગસ્ટ 2019ના રોજ ગંજ પોલીસ સ્ટેશનમાં રિપોર્ટ નોંધાવ્યો હતો, જેમાં તેમણે આરોપ લગાવ્યો હતો કે, તત્કાલિન સીઓ આલે હસન, ઇન્સ્પેક્ટર ફિરોઝ ખાન, કોન્ટ્રાક્ટર બરકત અલી, સીએન્ડડીએસના જેઇ પરવેઝ આલમ 6 ડિસેમ્બર 2016ના રોજ સવારે ટાઉનશિપ પહોંચ્યા હતા. તેમજ તેમનું ઘર ખાલી કરવા કહ્યું હતું. આરોપ છે કે, ઈન્સ્પેક્ટર ફિરોઝે પણ ગોળીબાર કર્યો હતો. તેમજ તેનું વોશિંગ મશીન, સોનું, ચાંદી અને પાંચ હજાર રૂપિયાની લૂંટ ચલાવી હતી. તપાસમાં સપા નેતા આઝમ ખાનનું નામ પણ સામેલ હતું. આ કેસમાં ખૂનનો હુમલો અને લૂંટના આરોપો પણ છે.