નવી દિલ્હી, 14 સપ્ટેમ્બર 2026: ભારતીય મહિલા ક્રિકેટ ટીમે ભવ્ય પ્રદર્શન કરતા મહિલા એશિયા કપ 2026ની ફાઇનલ મેચમાં શ્રીલંકાને 72 રનથી કચડીને 8મી વખત એશિયા કપના ખિતાબ પર પોતાનો કબજો જમાવ્યો છે. જોકે, ભારતની આ ભવ્ય જીત બાદ મેદાન પર એક મોટો હાઇવોલ્ટેજ ડ્રામા સર્જાયો હતો. ભારતીય પુરુષ ટીમની માફક જ હવે ભારતીય મહિલા ટીમે પણ એશિયન ક્રિકેટ કાઉન્સિલ (ACC) અને પાકિસ્તાન ક્રિકેટ બોર્ડ (PCB)ના અધ્યક્ષ મોહસિન નકવીના હાથે ટ્રોફી સ્વીકારવાનો સ્પષ્ટ ઇનકાર કરી દીધો છે.
ફાઇનલ મેચમાં મોહસિન નકવી એસીસીના અધ્યક્ષ હોવાના નાતે ચીફ ગેસ્ટ તરીકે પહોંચ્યા હતા. તેમણે રનર્સ-અપ રહેલી શ્રીલંકન ટીમની કેપ્ટન ચમારી અટાપટ્ટુને રનર્સ-અપનો ચેક આપ્યો હતો. પરંતુ જ્યારે વિજેતા ભારતીય ટીમને ટ્રોફી આપવાની વારી આવી, ત્યારે ભારતીય ટીમ લાંબા સમય સુધી પ્રેઝન્ટેશન પોડિયમ પર આવી જ નહોતી. નકવી પોડિયમ પર ટ્રોફી સાથે ઉભા રહ્યા, પરંતુ ભારતીય ખેલાડીઓએ તેમના હાથે ટ્રોફી કે મેડલ લેવાનો ઇનકાર કરી દીધો હતો. આ દરમિયાન બીસીસીઆઈ સેક્રેટરી દેવજીત સૈકિયા પણ ભારતીય મહિલા ટીમ સાથે જોવા મળ્યા હતા.
અત્રે ઉલ્લેખનીય છે કે, આ પહેલા વર્ષ 2025ના પુરુષ એશિયા કપમાં પણ સૂર્યકુમાર યાદવની કપ્તાની હેઠળની ભારતીય ટીમે નકવીના હાથે ટ્રોફી લેવાની ના પાડી દીધી હતી. તે સમયે નકવી ટ્રોફી પોતાની સાથે લઈ ગયા હતા. હવે મહિલા ટીમે પણ એ જ વલણ અપનાવીને પાકિસ્તાન અને એસીસી અધ્યક્ષને મોટો ઝાટકો આપ્યો છે.
-
શેફાલી-સ્મૃતિની વિસ્ફોટક બેટિંગ અને દીપ્તિની ઘાતક બોલિંગ
ફાઇનલ મુકાબલામાં ભારતીય ટીમે ટોસ જીતીને પ્રથમ બેટિંગ કરવાનો નિર્ણય લીધો હતો. ભારત તરફથી ઓપનર શેફાલી વર્મા અને વાઇસ કેપ્ટન સ્મૃતિ મંધાનાએ શ્રેષ્ઠ શરૂઆત અપાવી હતી. બંને બેટર્સની શાનદાર અડધી સદીના દમ પર ભારતે નિર્ધારિત ઓવરોમાં 183 રનનો વિશાળ સ્કોર ઊભો કર્યો હતો. 184 રનના ટાર્ગેટનો પીછો કરવા ઉતરેલી શ્રીલંકન ટીમ ભારતીય બોલરો સામે ટકી શકી નહોતી અને સમગ્ર ટીમ માત્ર 111 રનમાં ઓલઆઉટ થઈ ગઈ હતી. ભારત તરફથી બોલિંગમાં દીપ્તિ શર્માએ ઉત્કૃષ્ટ પ્રદર્શન કરતા 4 વિકેટ ઝડપી હતી, જ્યારે શ્રી ચરણીએ 3 વિકેટ લઈને શ્રીલંકાના બેટિંગ લાઇન-અપની કમર તોડી નાખી હતી. ભારતે આ મેચ 72 રને જીતીને એશિયા કપ ક્ષેત્રે પોતાનું વર્ચસ્વ ફરી એકવાર સાબિત કર્યું છે.
