સુરેન્દ્રનગરઃ ઝાલાવાડ પંથકમાં અકસ્માકોના બનાવો વધતા જાય છે.સુરેન્દ્રનગર જિલ્લામાં અકસ્માતના બે બનાવોમાં બે લોકોનાં મોત નિપજ્યા હતા. અને 2 લોકોને ઈજાઓ પહોંચી હતી. લીંબડી-રાણપુર રોડ અને લીંબડી-સુરેન્દ્રનગર રોડ પર આ બંને અકસ્માત સર્જાયા હતા.
પોલીસના સૂત્રોમાંથી મળેલી વિગતો મુજબ, સુરેન્દ્રનગર જિલ્લાના લીંબડી-રાણપુર રોડ પર આવેલા પાંદરી ગામ નજીક એક અકસ્માત સર્જાયો હતો. જેમાં આઈશર ચાલકે બાઈકને જોરદાર ટક્કર મારી હતી. જેમાં બાઈક ચાલક મોજુભાઈ ડાગરોચાનું ઘટના સ્થળે જ કમકમાટીભર્યુ મોત નીપજ્યુ હતુ. જ્યારે બાઈક પર સવાર અન્ય વ્યક્તિને ઈજા પહોંચી હતી. અકસ્માત બાદ લોકો ઘટના સ્થળે દોડી આવ્યા હતા. સ્થાનિકોએ ઈજાગ્રસ્ત બાઈક સવારને 108 મારફતે લીંબડીની આર.આર.હોસ્પિટલમાં સારવાર માટે ખસેડ્યો હતો. આ અકસ્માત બાદ આઈશર ચાલક ઘટના સ્થળેથી ફરાર થયો હતો. બનાવની જાણ થતા પોલીસ પણ ઘટના સ્થળે પહોંચી હતી અને ગુનો નોંધીને આગળની કાર્યવાહી હાથ ધરી હતી. અકસ્માત કયા કારણોસર સર્જાયો એ દિશામાં પણ પોલીસે તપાસ હાથ ધરી છે.
બીજો અકસ્માત લીંબડી-સુરેન્દ્રનગર રોડ પર આવેલા અંકેવાળીયા ગામ નજીક સર્જાયો હતો. લીંબડીથી દૂધ ભરીને આવી રહેલા ટેન્કર ચાલકને જોરદાર અકસ્માત નડ્યો હતો. ટેન્કર ચાલકે કોઈ કારણોસર સ્ટિયરિંગ પરનો કાબૂ ગુમાવ્યો હતો. બાદ સુરેન્દ્રનગર તરફથી આવી રહેલા ટ્રેક્ટર સાથે ધડાકાભેર અથડાયુ હતુ. આ અકસ્માતમાં ટ્રેક્ટરના બે ટુકડા થઈ ગયા હતા. અકસ્માત સર્જીને ટેન્કર ચાલક ઘટના સ્થળેથી ફરાર થયો હતો. આ અકસ્માતમાં ટ્રેક્ટર ચાલક અને તેની સાથે બેસેલા કુલદીપસિંહ ડોડીયા અને મહાવીરસિંહને ગંભીર ઈજાઓ પહોંચી હતી. અકસ્માતના પગલે સ્થાનિક લોકો દોડી આવ્યા હતા. બાદમાં સ્થાનિકોએ અકસ્માતની જાણ પોલીસ અને 108ને કરી હતી. બાદ ઈજાગ્રસ્તોને સારવાર માટે લીંબડીની આર.આર.હોસ્પિટલ ખાતે ખસેડવામાં આવ્યા હતા. જો કે, ઈજાગ્રસ્તો ગંભીર રીતે ઘાયલ થયા હોવાથી તેઓને વધુ સારવાર માટે સુરેન્દ્રનગરની હોસ્પિટલમાં ખસેડવામાં આવ્યા હતા. જ્યાં સારવાર દરમિયાન કુલદીપસિંહનું મોત નીપજ્યુ હતુ. પોલીસે આ મામલે ગુનો નોંધીને આગળની કાર્યવાહી હાથ ધરી છે.
