અમદાવાદઃ રાજ્યની પ્રાથમિક શાળાઓના શિક્ષકોને શાળાઓમાં સતત આઠ કલાકની હાજરી સાથે શિક્ષણ કાર્ય કરવાનું સરકાર ઘણા સમયથી વિચારી રહી છે. હવે તે અંગેના નિયમો બનાવવામાં આવી રહ્યા છે. જોકે શાળાઓમાં પ્રાથમિક શિક્ષકોનો સમય આઠ કલાક કરવામાં આવશે તો તેનો વિરોધ થવાની પણ શક્યતા છે. સરકારના શિક્ષણ વિભાગના ઉચ્ચ અધિકારીઓ તો એવો દાવો કરી રહ્યા છે કે, રાજ્ય સરકારના અન્ય કર્મચારીઓ આઠ કલાક સેવા આપે જ છે. તો શિક્ષકોને શું વાંધો હોઈ શકે, નવી શિક્ષણ નીતિ મુજબ શિક્ષકોએ વધુ કામ કરવું પડશે.
સૂત્રોના જણાવ્યા મુજબ થોડા સમય પહેલા શિક્ષણ વિભાગ દ્વારા પરિપત્ર બહાર પાડીને આદેશ આપવામાં આવ્યો હતો કે ગુજરાત રાજ્યની પ્રાથમિક શાળાના શિક્ષકોએ શાળામાં છના બદલે આઠ કલાક હાજર રહેવું પડશે. પરંતુ શિક્ષકો દ્વારા વિરોધ કરવામાં આવતા શિક્ષણ મંત્રીએ આ પરિપત્ર રદ્દ કરવો પડ્યો હતો. પરંતુ હવે ફરી એકવાર તે પરિપત્રનો અમલ થાય તેવી શક્યતાઓ શિક્ષણમંત્રી જીતુ વાઘાણીએ પણ વ્યક્ત કરી હતી. જીતુ વાઘાણીની જાહેરાત પછી હવે શિક્ષકોની શું પ્રતિક્રિયા હશે તે પ્રશ્ન ઉભો થઈ રહ્યો છે.
રાજ્યના શિક્ષણ મંત્રી જીતુ વાઘાણીએ જણાવ્યું હતું કે, રાજ્યમાં શિક્ષણનું સ્તક વધારે મજબૂત બને અને વિદ્યાર્થીઓના પરિણામમાં સુધારો આવે તે માટે શિક્ષકો દ્વારા શાળા છૂટ્યા પછી વધારાના એક અથવા બે કલાક સુધી શિક્ષણ આપવામાં આવશે. આટલુ જ નહીં, જો જરૂર જણાશે તો રજાના દિવસે પણ શિક્ષણ આપવાનું આયોજન કરવામાં આવશે. આ બાબતને ધ્યાનમાં રાખીને નિયમો બનાવવામાં આવશે.
ઉલ્લેખનીય છે કે રાઈટ ટુ એજ્યુકેશન એક્ટની જોગવાઈ અનુસાર પ્રાથમિક શાળામાં શિક્ષકોનો સમય આઠ કલાક કરવાનો પરિપત્ર 3 સપ્ટેમ્બર, 2021ના રોજ જાહેર કરવામાં આવ્યો હતો. પરંતુ રાજ્યના શિક્ષકો દ્વારા આ પરિપત્રનો વિરોધ કરવામાં આવ્યો હતો. નોંધનીય છે કે સરકારના અન્ય તમામ વિભાગોમાં કર્મચારીઓ આઠ કલાકની ફરજ બજાવતા હોય છે. તેમ છતાં શિક્ષકોએ વિરોધ નોંધાવતા શિક્ષણમંત્રીએ નિર્ણય પરત ખેંચી લીધો હતો. પરંતુ શિક્ષણ મંત્રી જીતુ વાઘાણીએ ફરી એકવાર શિક્ષકોનો સમય આઠ કલાક કરવામાં આવશે તેવા સંકેત આપ્યા છે. વર્તમાન સ્થિતિની વાત કરીએ તો રાજ્યની મોટાભાગની શાળાઓમાં બપોર પાળીનો સમય સવારના 11થી સાંજના પાંચ સુધીનો હોય છે. આ પદ્ધતિમાં શિક્ષકોની ફરજનો સમય છ કલાકનો હોય છે. હવે શિક્ષણ મંત્રીએ એવી જાહેરાત કરી છે કે, બાળકોને વધારે એક અથવા બે કલાક ભણાવવામાં આવશે. હવે આ વાતનો અમલ કરવામાં આવશે તો આડકતરી રીતે આપોઆપ સમય આઠ કલાકનો સમય થઈ જશે.
