નામ એટલું મોટું કે પોતાને પણ યાદ નથી રહેતું, છ પાનાંનો દસ્તાવેજ સાથે લઈને ફરવું પડે છે

રિવોઈ ન્યૂઝ, 1 જુલાઈ, 2026 –  નામ મેં ક્યા રખ્ખા હૈ, એવો ફિલ્મી ડાયલોગ વારંવાર સાંભળવા મળતો હોય છે, પરંતુ સૌ જાણીએ છીએ કે નામ વિના કશું જ નથી. મૂળ ઓળખ ત્યાંથી જ શરૂ થાય છે. અને હવે જે સમાચાર મળી રહ્યા છે તેણે તો સમગ્ર નામ-કાંડ કરી દીધો છે. અર્થાત આ ભાઈએ નામ એટલું મોટું રાખ્યું છે કે પોતાને પણ યાદ નથી રહેતું, છ પાનાંનો દસ્તાવેજ સાથે લઈને ફરવું પડે છે.

લગ્ન હોય કે કોઈ સરકારી ફોર્મ, દરેક જગ્યાએ તમારું નામ પૂછવામાં આવે છે, પરંતુ જરા વિચારો કે જો તમારું નામ વાંચવામાં જ 20 મિનિટનો સમય લાગી જાય તો શું થાય? લોરેન્સ વોટકિન્સના પરંપરાગત નામે ઓળખાતા આ ભાઈએ તેમના નામમાં 2,253 નામો ઉમેરીને એક અલગ જ રેકોર્ડ બનાવી દીધો છે.

આ પણ વાંચોઃ એર ફોર્સ સ્ટેશન વડોદરા દ્વારા ઇન્ડસ્ટ્રી આઉટરીચ પ્રોગ્રામનું આયોજન કરાયું

અવારનવાર લોકો પોતાના નામને લઈને પરેશાન રહેતા હોય છે કે તે નાનું છે કે મોટું, પરંતુ જો તમે ન્યૂઝીલેન્ડના લોરેન્સ વોટકિન્સની વાર્તા સાંભળશો, તો તમે તમારા નામને લઈને પોતાને નસીબદાર માનશો. તેમણે એવો પરાક્રમ કર્યો છે જે સાંભળીને દરેક વ્યક્તિ દંગ રહી જાય છે. પોતાની ઓળખ ગિનીસ બુકમાં નોંધાવવા માટે તેમણે નામોની આખી ડિક્શનરી જ પોતાના નામની આગળ જોડી દીધી.

જ્યારે લગ્નમાં હાસ્યનું મોજું ફરી વળ્યું

વાર્તા ત્યારે મજાદાર બની ગઈ જ્યારે લોરેન્સ પોતાના લગ્નના મંડપમાં પહોંચ્યા. કાયદા અનુસાર, લગ્ન કરાવનાર અધિકારી માટે વરરાજાનું પૂરું કાયદેસરનું નામ વાંચવું ફરજિયાત હતું. લગ્ન દરમિયાન જેવું નામ વાંચવાનું શરૂ કર્યું, જોતજોતામાં 20 મિનિટ વીતી ગઈ. મહેમાનો પોતાનું હાસ્ય રોકી શક્યા નહીં અને આખો હોલ હાસ્યના ગડગડાટથી ગુંજી ઊઠ્યો. આ ક્ષણ કોઈ કોમેડી ફિલ્મના દ્રશ્ય જેવી હતી, જ્યાં વરરાજા પોતે ઊભા રહીને પોતાના જ નામની લાંબી યાદી સાંભળી રહ્યા હતા.

શા માટે રાખ્યા 2253 નામ?

વાત 1990 ના દાયકાની છે, જ્યારે લોરેન્સ ઓકલેન્ડની એક લાઈબ્રેરીમાં કામ કરતા હતા. તેમનામાં કંઈક અલગ કરવાનો જુસ્સો હતો. તેમણે અંગ્રેજી, લેટિન, જાપાનીઝ અને માઓરી જેવી ઘણી ભાષાઓના શબ્દો ભેગા કર્યા. મિત્રોની મદદથી નામોની એવી યાદી બનાવી જે ઇતિહાસ બની ગઈ. જોકે, પાછળથી તેમણે કાયદાકીય લડત લડવી પડી અને ત્યાર પછી જ તેમનું નામ સત્તાવાર રીતે નોંધાયું.

રોજિંદા જીવનની મૂંઝવણ

હકીકત એ છે કે ખુદ લોરેન્સને પોતાના બધા નામ યાદ નથી. ફોર્મ ભરવાનું હોય કે ઓળખપત્ર બતાવવાનું હોય, તેમણે હંમેશા પોતાના નામોની યાદી સાથે લઈને ચાલવું પડે છે. તેમણે પોતે સ્વીકાર્યું છે કે આટલા બધા નામોનું ઉચ્ચારણ કરવું અશક્ય જેવું છે. હવે તો સરકારી નિયમોમાં પણ તેમના કારણે ફેરફાર કરવામાં આવ્યા છે, જેથી ફરી કોઈ આવો અનોખો પરાક્રમ ન કરી શકે. જોકે લોરેન્સની આ સફર દર્શાવે છે કે જુસ્સાની કોઈ સીમા નથી હોતી, બસ ક્યારેક આ જુસ્સો થોડો ‘વધારે પડતો’ થઈ જાય છે. આજે આટલા વર્ષો પછી પણ તેમનું આ નામ તેમને દુનિયાભરમાં પ્રખ્યાત બનાવી રાખે છે.