કેનેડાએ 139 મિલિયન ડોલરની કિંમતનું ડ્રગ્સ જપ્ત કર્યું, ભારતીય મૂળના ટ્રક ડ્રાઇવરોની ધરપકડ
ઓટાવા, 26 જુલાઈ 2026: કેનેડાના ઓન્ટારિયોમાં સરહદ પારના ગેરકાયદેસર ડ્રગ્સની દાણચોરી કરતા એક મોટા નેટવર્કનો પર્દાફાશ થયો છે; કેનેડા બોર્ડર સર્વિસીસ એજન્સીએ 1.7 ટન ગેરકાયદેસર ડ્રગ્સ જપ્ત કર્યા છે. જપ્ત કરાયેલા ડ્રગ્સનું બજારમૂલ્ય અંદાજે 139 મિલિયન ડોલર હોવાનું માનવામાં આવે છે.
ભારતીય મૂળના કેટલાક ટ્રક ચાલકોની ધરપકડ કરવામાં આવી
‘પ્રોજેક્ટ બે’ (Project Bay) નામના વિશેષ અભિયાન અંતર્ગત, પોલીસે ઑન્ટારિયોના વિવિધ વિસ્તારોમાં—જેમાં વિન્ડસર, લા-સાલે, કોરુના, બ્રેમ્પટન, માર્ખમ અને કેલેડનનો સમાવેશ થાય છે. 22 સ્થળોએ દરોડા પાડ્યા હતા અને ભારતીય મૂળના કેટલાક ટ્રક ડ્રાઇવરો સહિત 19 વ્યક્તિઓની ધરપકડ કરી હતી.
ભારતીય મૂળના વ્યક્તિઓની ઓળખ ગગનદીપ થીંડલ, સિમરનજીત સિંહ, કંવરપાલ કુલાર, જતિન્દરપાલ સિંહ, જસવિંદર સોહી, તેજવિંદર સંધુ, હરજીવિંદર સંધુ, તરમિન્દર સિંહ, ગુનદીપ તારીવાલ, મહાકપ્રીત સિંહ અને કરણદીપ સિંહ તરીકે કરવામાં આવી હતી.
કઈ વસ્તુઓ જપ્ત કરવામાં આવી હતી?
કેનેડા બોર્ડર સર્વિસીસ એજન્સીએ અહેવાલ આપ્યો છે કે અધિકારીઓએ અંદાજે 139 મિલિયન ડોલરની કિંમતનો આશરે 1.7 ટન ગેરકાયદેસર નશીલો પદાર્થ જપ્ત કર્યો છે, જેમાં શંકાસ્પદ કોકેઈન, મેથામ્ફેટામાઈન અને અફીણનો સમાવેશ થાય છે. પોલીસે 973 કિલોગ્રામ કોકેઈન, 660 કિલોગ્રામ મેથામ્ફેટામાઈન, 49 કિલોગ્રામ અફીણ અને 230 ઓક્સિકોડોન ગોળીઓ જપ્ત કરી હતી.
આ ઉપરાંત, પોલીસે રોકડ રકમ, કિંમતી ઘરેણાં, મની કાઉન્ટર, ગેંગ દ્વારા વપરાયેલું વાહન, 43 મોબાઈલ ફોન અને છ લેપટોપની સાથે 17 હથિયારો (જેમાં એન્ટી-ટેન્ક રાઈફલનો પણ સમાવેશ થાય છે) જપ્ત કર્યા છે. ઓન્ટારિયોમાં એક જ તપાસ દરમિયાન ડ્રગ્સની જપ્તીની આ ઘટનાને સૌથી મહત્વપૂર્ણ કિસ્સાઓમાંના એક તરીકે વર્ણવવામાં આવી રહી છે.
